Këshilli Prokurorial i Kosovës (KPK) ka suspenduar nga detyra kryeprokuroren e Prokurorisë Themelore në Pejë, Lumturije Vuçetaj, dhe prokuroren Arlinda Nallbani-Gacaferri, e cila trajtonte rastin e Arlinda Zekajt, të vrarë më 25 tetor. Ndaj të dyjave është iniciuar procedurë disiplinore, ndërsa për trajtimin e rastit është themeluar edhe një panel hetimor.
Vendimi u mor në një takim të jashtëzakonshëm të KPK-së, pas kërkesës së Kryeprokurorit të Shtetit, Zejnullah Gashi, për fillimin e procedurës disiplinore ndaj dy prokuroreve.
Sipas njoftimit të KPK-së, vendimi për suspendimin e tyre është bazuar në të gjeturat e raportit me numër reference A.Nr. 379/2026, të paraqitur nga Zyra e Kryeprokurorit të Shtetit, në lidhje me rastin e vrasjes së Arlinda Zekajt.
Në të njëjtën mbledhje, KPK-ja caktoi Valbona Disha-Haxhosajn ushtruese të detyrës së kryeprokurores në Prokurorinë Themelore në Pejë.
Rasti i vrasjes së Arlinda Zekajt ka ngritur shqetësime lidhur me mënyrën se si institucionet e drejtësisë i kanë trajtuar raportimet e saj dhe kërkesat për mbrojtje. Sipas informacioneve të bëra publike, Zekaj u vra më 25 tetor nga ish-kunati i saj, ndërsa tri ditë para vrasjes i kishte dërguar një letër kryeprokurores së Pejës, duke e paralajmëruar për rrezikun që i kanosej jetës së saj.
Procedura disiplinore dhe puna e panelit hetimor pritet të shqyrtojnë rrethanat dhe përgjegjësitë eventuale institucionale lidhur me trajtimin e rastit.
KPK-ja nuk ka bërë të ditura në këtë njoftim përfundimet e hetimit disiplinor, ndërsa suspendimi nuk nënkupton paraprakisht se përgjegjësia e prokuroreve është vërtetuar.
