Sot, Qeveria e Kosovës në mbledhjen e saj ka vendosur sanksione të reja ndaj grupit kriminal rus, Wagner, teve1.info.
Kryeministri i Kosovës, Albin Kurti, ka thënë se këto sanksione janë në bashkërendim të plotë me partnerët ndërkombëtar.
“Pika 9 e rëndit të ditës: Shqyrtimi i Propozim-vendimit për ndryshimin dhe plotësimin e Vendimit të Qeverisë Nr.03/78 të datës 16 maj 2022, për vendosjen e masave kufizuese kundër Grupit Wagner-një etnitet ushtarak privat i pa inkorporuar, me bazë në Rusi (MPJD). Në zbatim të sanksioneve ndërkombëtare nga ana e Republikës së Kosovës në raport me obligimet ndërkombëtare ndaj veprimeve e këtij grupi që minojnë dhe kërcënojnë etnitetit territorial, sovranitetin dhe pavarësinë e Ukrainës është propozuar Propozim-ndryshimi i vendimit të Qeverisë. Këto lloj sanksione janë në bashkërendim të plotë me partnerët tanë ndërkombëtar”, tha kryeministri.
Ndërkaq, në fjalën e tij zëvendëskryeministri, Besnik Bislimi, ka thënë se Departamenti i Thesarit ka ndërmarrë masa kufizuese ndaj grupit Wagner, duke përfshirë edhe rrjetin mbështetës global të tyre.
“Ministria e Punëve të Jashtme propozon plotësim-ndryshimin e vendimit të qeverisë të marrë më 16 maj 2022, për zbatim të sanksioneve ndërkombëtare të vendosura nga ShBA-ja e që implementohen nga Kosova në raport me obligimet ndërkombëtare ndaj grupit Wagner si dhe bashkëpunëtorëve të tyre dhe kompanive të tjera që mbështesin fushatës luftarake ruse”, ka thënë Bislimi.
Në janar, Departamenti amerikan i Thesarit ka vendosur sanksionet të reja që shënjestrojnë gjashtë individë dhe 12 entitete, përfshirë edhe një kompani të imazheve satelitore nga Kina dhe kompani dhe persona në Republikën Qendrore Afrikane, ku Wagner ka mercenarë aktivë, por edhe në Emiratet e Bashkuara Arabe. Në njoftimin e Thesarit thuhet se sanksionet janë pjesë e përpjekjeve për të “degraduar aftësinë e Rusisë në luftën kundër Ukrainës”.
