Kombëtarja U21 e Kosovës në muajin shtator nis rrugëtimin drejt kualifikimit në Kampionatin Evropian të vitit 2027 që do të mbahet në Shqipëri e Serbi.
Pas një muaji, “Dardanët” e rinj nisin ciklin kualifikues dhe rrugëtimi i tyre nis me ndeshjen në udhëtim ndaj Rumanisë.
Kjo përballje do të luhet më datën 5 shtator dhe i takon Grupit A, të cilin e përbëjnë edhe Qipro, Spanja, Finlanda e San Marino.
“Kosova U21 është gati të nisë një kapitull të ri në kualifikimet për Kampionatin Evropian. Djelmoshat tanë e nisin fushatën me dy sfida të mëdha”, ka shkruar Federata e Futbollit të Kosovës.
Në fakt, Kosova U21 në shtator i luan dy ndeshje, pasi katër ditë pas përballjes me Rumaninë, e pret Spanjën në stadiumin “Fadil Vokrri” në Prishtinë.
