Ashtu si miliona sirianë të tjerë, edhe Rami Alargha është detyruar të largohet nga vendlindja për shkak të luftës dhe konflikteve të përgjakshme.
Prej një viti, ai së bashku me prindërit e tij ka gjetur strehim të sigurt në Kosovë.
24-vjeçari thotë se ndihet shumë mirë këtu, ndërsa falënderon shqiptarët për mikpritjen dhe mbështetjen që i kanë dhënë atij dhe familjes.
“Për shkak të luftës në Siri dhe rrethanave të tjera të vështira, u detyrova të largohem nga vendi im dhe të vij në Kosovë. Në fillim ishte shumë e vështirë, sepse atje kisha familjen dhe shoqërinë. Por, tani pas një viti qëndrimi këtu, ndjehem shumë më mirë. Të them të drejtën, më kanë trajtuar shumë mirë, mua dhe familjen time. Kosovarët janë shumë miqësorë, e sidomos kur kuptojnë se vij nga Siria. Përveç kësaj, kam krijuar edhe disa miq arabë këtu”, thotë për Tëvë 1 refugjati nga Siria.
Rami thotë se është përshtatur shpejt me jetën në Kosovë dhe tashmë planifikon të qëndrojë edhe më gjatë në këtë vend, që e cilëson si të sigurt dhe mikpritës.
“Në këto rrethana aktuale, është shumë e vështirë të kthehem në Siri. Prandaj, po planifikoj të qëndroj këtu edhe për disa vite. Do të jetë shumë e vështirë për mua ta lë Kosovën, sepse jam ambientuar mirë dhe ndihem shumë i sigurt këtu. Kam disa plane për të ardhmen dhe shpresoj shumë që ato të realizohen”, shprehet Rami Alargha.
Sipas të dhënave ndërkombëtare, refugjatët sirianë kanë kërkuar azil në mbi 130 vende të botës. Megjithatë, shumica dërrmuese – mbi 5 milionë – jetojnë ende në vendet fqinje të rajonit si Turqia, Libani, Jordania dhe Iraku.
