Një raport i publikuar nga kompania amerikane Gallup, për siguri globale ka radhitur Kosovën të 12-tën sa i përket kësaj fushe në mesin e 24 shteteve të botës. Disa nga qytetarët i janë gëzuar kësaj ankete, por ka të tjerë që thonë se në këtë vit nuk ndihen aq të sigurt për shkak të ngjarjeve që kanë ndodhur së fundi në vend. Ndërkaq, kriminologët përmendin si cenues të sigurisë qentë endacak
87% e qytetarëve janë ndier të sigurte kur kanë ecur natën rrugëve të Kosovës në vitin 2023.
Kjo u bë e ditur në një raport të kompanisë amerikane “Gallup” për siguri globale.
Në baza të të gjeturave Kosova është radhitur në vendin e 12-të sa i përket aspektit të sigurisë në botë.
Rezultatet e anketës amerikane e kanë gëzuar Muhadin Haxhiun nga Prishtina.
“Njerëz që e njohin këtë lami edhe e kanë dhënë atë vlerësim sigurisht në bazë të analizave profesionale dhe janë ekspert të kësaj lamije nuk dyshoj në të. Për mua mjafton që ata që e kanë dhënë këtë vlerësim, unë përderisa e kem Amerikën këtu unë nuk tutna”, thotë ai.
Por qytetari Gani Ademaj, thotë që kohëve të fundit nuk është ndier i sigurte.
Këtu rendit edhe ngjarjet që kanë ndodhur së fundmi në vend.
“Sipas ecurive që ne po dëgjojmë çdo mbrëmje në lajmet qendrore aspak nuk ndihesh i sigurt me dal për një diçka që e kënaq njeriun që e relakson njeriun, flas në aspektin e sigurisë së përgjithshme. Jemi dëshmitar të asaj se çka ndodhi në Klinë, vrasje sikur me qenë se di një anarki e pa kontrolluar”, shprehet ky qyetar.
Si cenim të sigurisë në vend, kriminologu, Armend Halimi i përmend edhe qentë endacak.
“Jemi dëshmitar ne vet për numrin e madh të krimeve, vrasjeve, grabitjeve, vjedhjeve ngacmime e kështu me radhë. Shtoi kësaj në qoftë se marrim për bazë çdo gjë që shqetëson qytetarët, qenët endacak po ashtu janë të cilët sjellin pasiguri te qytetarët jo vetëm natën por edhe në pikën e ditës”, thotë Halimi.
Tutje Halimi, thotë që një prej faktorëve të cilët do të duhet të i jepnin një siguri Kosovës është edhe numri i mjaftueshëm i Policisë në proporcion me numër të banorëve sipas një standardi evropian.
Megjithatë i gëzohet të gjeturave për nivelin e sigurisë në vitin 2023.
“Ne i gëzohemi çdo pasqyrimi të tillë që Kosovën e liston për pozitivitet. Ngase asgjë tjetër asnjë lami apo fushë nuk është më me rëndësi se sa siguria, qoftë edhe ekonomia sepse nuk do të kishte zhvillim ekonomik nuk do të kishte investime nga jashtë në qoftë se vendi karakterizohet me pasiguri”, thotë ai.
Ndërkohë në mesin e 24 shteteve që janë të sigurta i pari është renditur Kuvajti, pastaj Singapori, Norvegjia, Arabia Saudite, Taxhikistani, Sllovenia e shtete të tjera.
Kronika e realizuar nga Fëllënza Krasniqi
