Kosova do të përfaqësohet në Lojërat Mesdhetare Taranto 2026 me numrin më të madh të sportistëve dhe sporteve në historinë e pjesëmarrjes së saj në këtë ngjarje shumë-sportëshe, ka njoftuar Komiteti Olimpik i Kosovës (KOK).
Delegacioni i Kosovës, do të përbëhet nga 163 sportistë, prej tyre 87 meshkuj dhe 76 femra, të cilët do të garojnë në 21 sporte, me synimin për ta përfaqësuar vendin sa më denjësisht.
Për herë të parë, Kosova do të garojë me katër sporte ekipore: futboll (meshkujt U21 dhe femrat U19), volejboll (meshkujt dhe femrat), hendboll (meshkujt dhe femrat) dhe basketboll 3×3 (meshkujt dhe femrat).
Në dy edicionet e kaluara të Lojërave Mesdhetare, Kosova ka fituar gjithsej 10 medalje, nëntë në xhudo dhe një në boks.
Lojërat Mesdhetare “Taranto 2026” do të zhvillohen nga 21 gushti deri më 3 shtator 2026.
“Një moment i veçantë gjatë ceremonisë së mbylljes do të jetë dorëzimi i flamurit të Lojërave Mesdhetare Kosovës, si vendi mikpritës i edicionit të ardhshëm, Prishtina 2030”, ka shkruar KOK në njoftim.
