Kosova ngjitet në renditjen e FIFA-s.
Dardanët zhvilluan vetëm një takim në muajin tetor, atë përballë Andorrës në transfertë, ndeshje me të cilën djemtë e Primoz Gliha e fituan 0-3.
Ishte suksesi i parë i dardanëve në grupin I të eliminatoreve të Euro 2024. Ndërkohë që përballja me Izraelin, e programuar të luhej në “Fadil Vokrri”, u shty për shkak të luftës në Lindjen e Mesme.
Kjo sfidë është programuar të zhvillohet në datën 12 nëntor në stadiumin “Fadil Vokrri”. Fitorja 0-3 në transfertë ka dërguar Kosovën nga vendi numër 111 në atë 105. 6 pozicione më sipër krahasuar me një muaj më parë.
Kosova mbyll fazën eliminatore të Euro 2024 me transfertën kundër Zvicrës (18 nëntor) dhe takimet shtëpiake në Prishtinë me Izraelin (12 nëntor) dhe Bjellorusinë (21 nëntor).
Derisa fitorja 3-0 përballë Çekisë ka afruar kombëtaren kuqezi me Europianin Gjermani 2024. Tashmë nevojitet një pikë në dy sfidat e fundit përballë Moldavisë dhe Ishujve Faroe që skuadra e Sylvinhos të sigurojë matematikisht kualifikimin në Europianin e verës së ardhshme.
Kuqezinjtë triumfuan 2-0 edhe në miqësoren përballë Bullgarisë, e luajtur pesë ditë pas triumfit historik ndaj çekëve. Dhe dy sukseset e muajit tetor kanë sjellë ngjitjen e Shqipërisë në renditjen e FIFA-s.
Kombëtarja renditet në vendin numër 59, tri pozicione më sipër krahasuar me renditjen e muajit të kaluar. Synimet e radhës janë fitoret në Moldavi dhe me Ishujt Faroe në “Air Albania”.
Që do të sillnin “blindimin” e vendit të parë në grupin E, gjithashtu edhe një pozicionim edhe më të mirë në renditjen e FIFA-s. Shqipëria sfidon Moldavinë në transfertë në datën 17 nëntor (18:00), teksa tri ditë më vonë zbarkojnë Ishujt Faroe në kryeqytetin shqiptar.
Sipër kuqezinjve në renditjen e FIFA-s qëndrojnë Polonia (31) dhe Çekia (41). Ndërkohë që Ishujt Faroe dhe Moldavia mbajnë pozicionet numër 135 dhe 157.
