Kryetari i Kuvendit, Glauk Konjufca, gjatë mbledhjes së Kryesisë së Kuvendit, ka thënë se Shtetet e Bashkuara të Amerikës nuk po i kuptojnë drejt pozicionet e Kosovës.
Gjatë diskutimit për tensionimet e fundit në komunat veriore të vendit, Konjufca vlerësoi se qortimet e vazhdueshme nga ShBA-të nuk janë të mira për Kosovën, derisa shtoi se do ishte e drejtë të mbahej një dialog i hapur me partnerët ndërkombëtarë, për t’i argumentuar pozicionet e shtetit.
Njëherit, kryekuvendari ka komentuar edhe deklaratën e Sekretarit amerikan të Shtetit, Antony Blinken, lidhur me zhvillimet e fundit, përcjell teve1.info.
“Sa i përket deklaratës së Blinken, nuk është hera e parë që po na ndodhë kjo që hasim gjuhë të ashpër nga Shtetet e Bashkuara të Amerikës. Kjo nuk është e mirë për Kosovën, ne e pranojmë që është një gjë e keqe për ne. Gjithçka që duhet të bëjmë, është ta mbajmë një dialog të hapur dhe të shtruar me të gjithë miqtë dhe partnerët tanë dhe t’i argumentojmë më mirë pozicionet e Kosovës. Ndoshta pozicionet e Kosovës nuk po kuptohen drejt nga Shtetet e Bashkuara të Amerikës. Kryetarët atje, në pjesën e veriut kanë dhënë dorëheqje, dorëheqjet e tyre atje nuk ishin nga dhuna e Kosovës. Institucionet mbetën vakante dhe ato janë pjesë e shtetit të Kosovës. Atje Kosova nuk pati zgjedhje tjetër, veçse t’i shpallë zgjedhjet, madje pas një dakordimi me ShBA-të që zgjedhjet të shtyhen për 5 muaj. Tani këta 5 muaj përfunduan, dy opsione i kishte Kosova, ose ta dëgjonte Vuçiqin, ose të procedonte se si thotë Kushtetuta. Ne natyrisht që e zgjodhëm versionin e dytë dhe nuk ka diskutim për alternativa tjera”, deklaroi Konjufca në një prononcim për media./teve1.info/.
