Kuvendit i kanë mbetur vetëm edhe katër ditë kohë që të zgjedh presidentin e ri të Kosovës.
Konsensusi akoma po mungon.
Mirëpo, një deputet i Kuvendit të Kosovës e ofroi sot një zgjidhje.
“Bëj thirrje, nuk po e them me ironi, edhe ne nëse vërtetë ka mbetë Kosova pa asnjë person që mund të jetë konsensual ne si komunitet egjiptian jemi të gatshëm me ofru një kandidat konsensual”, tha Veton Berisha nga PLE-ja.
Deklarata e deputetit të Partisë Liberale Egjiptiane, duke se i zuri në befasi partitë opozitare.
“Deklaratë simpatike. Asgjë më shumë”, tha Anton Quni nga LDK-ja.
“Hipotetikisht e kam problem me dhanë përgjigje. Kam qejf me kanë në kohë as para kohe as mbas. Do të pres momentin që nëse vjen një propozim i tillë ose nëse ne na vjen në dorë një kërkesë e tillë, atëherë do të bëjmë të qartë edhe propozimin tonë si parti sepse ne nuk e kemi ditë më herët që vjen një propozim i tillë. Ai e tha sot në seancë kështu që PDK i merr vendimet në organet e saj drejtuese”, deklaroi Ganimete Musliu nga PDK-ja.
Për deklaratën e deputetit Berisha, nuk deshi të flas gjatë as deputeti i Vetëvendosjes, Mefail Bajqinovci.
“Vetoni është në koalicion me LVV dhe i kemi 66 deputet, pyetja duhet të i bëhet opozitës pse nuk e kanë bërë publikë emrin të kandidatit konsensual mbipartiak deri më sot. Tash po dalin po thonë na takon neve partive politike, pra i kanë ndërruar qëndrimet ne i kemi 66 vota së bashku me Vetonin”, tha Bajqinovci.
Nga Aleanca për Ardhmërinë e Kosovës nuk kanë dashur të flasin për këtë ofertë të deputetit Veton Berisha.
