Ekskavatorët u ndezën sërish në sheshin “Xhorxh Bush” në Prishtinë.
Të hënën, këtu u panë kamionë e punëtorë të cilët rinisën punimet në.
I bindur, se puna do të kryhet deri në fund pavarësisht ndalimit nga Inspektorati i Trashëgimisë Kulturore, ishte kryetari i Prishtinës, Përparim Rama.
Ai nga terreni tha që ligji është në anën e tyre.
“Unë e kam thane edhe më përpara qe inspektori qe i ka ndal këto punime ka vepruar jashtë ligjit, e ne kemi bërë kallxim penal ndaj tij. Ne punimet i vazhdojmë edhe nuk do ti ndalim sepse jemi përbrenda secilës kornizë ligjore. Kështu që jemi këtu për të mirën e qytetarëve, për të mirën e kryeqytetit, po e heqim këtë asfalt këtu po e transformojmë me pllaka të mëdha te gurit po e transformojmë fytyrën e Prishtinës”, u shpreh Rama.
Ai u zotua se do ti mbrojnë objektet përreth zonës së planifikuar për ndërtim.
“Mirëpo edhe po i mbrojmë këto ndërtesa si Rektorati, si Radio Televizioni, ne te njëjtën kohë kur Ministria thirret ne dokumentet te cilat janë drafte apo janë nonekzistencë, pra puna do të vazhdojë deri në përfundim të mirëfilltë të këtij projekti madhor”, u shpreh i pari i kryeqytetit.
E në këtë mes, Rama përfshiu edhe Policinë e Kosovës, duke thënë se në rast se ka ndërhyrje nga Inspektorati, Policia i dërgon te shtëpia ata.
Kurse nga opozita në kryeqytet thonë se përfshirja e Policisë nga ana e kryetarit Rama është shqetësues.
“Është për keqardhje kur i pari i kryeqytetit bënë deklarata te tilla te pavërteta e te pasinqerta. Për pjesën sa i përket sheshit, unë mendoj se çdo zhvillim, çdo ndërtim e çdo projekt i ri është i mirëseardhur veç se këto projekte duhet te jene në përputhje me ligjin, duke ju përshtatur kërkesave që rrjedhin nga këto ligje dhe natyrisht interesave e qytetareve”, ka thënë Sveçla.
Pasdite, këtë situatë e sqaroj vetë Policia e Kosovës.
“Prezenca e zyrtarëve policorë në sheshin “George Bush” në Prishtinë, sot ishte në asistim të Drejtorisë së Inspeksionit të Komunës së Prishtinës, për aktivitete të planifikuara në kuadër të punës sekondare, aktivitete këto që nuk ndërlidhen me asistimin e kryerjes se punimeve në atë zonë”, thuhet nga PK.
Punimet për ndërtimin e sheshit “Xhorxh Bush” në Prishtinë, të cilat parashihen të zgjasin një vit do të përfshijnë hapësirën prej katedrales “Nëna Terezë” deri te sheshi “Zahir Pajaziti”, projekt ky që prek shumën 18 milion euro.
Inspektorati për Trashëgimi Kulturore, për dy herë radhazi kishte ndalur punimet në sheshin “Xhorxh Bush” me arsyetimin se të njëjtat rrezikojnë objekteve të trashëgimisë kulturore.
Televizioni ka tentuar të marr një qëndrim edhe nga Inspektorati por që të njëjtit nuk ishin të qasshëm.
