Komuna e Vitisë ka shprehur ngushëllime për familjen Pira, pas vdekjes tragjike të të riut Aron Pira, i cili humbi jetën si pasojë e një aksidenti.
Në mesazhin e ngushëllimit, kryetari i Vitisë, Sokol Haliti, ka thënë se kjo humbje e papritur është dhimbje e madhe jo vetëm për familjen, por edhe për gjithë komunitetin.
“Me rastin e vdekjes tragjike të më të dashurit tuaj, Aron Pira, si pasojë e aksidentit tragjik, në emër të Komunës së Vitisë dhe në emrin tim personal, ju shpreh ngushëllimet më të sinqerta dhe më të thella”, thuhet në mesazhin e Halitit.
Ai ka shprehur solidaritet me familjarët, të afërmit dhe miqtë e të riut, duke theksuar se humbja e një të riu në mënyrë kaq të papritur lë pas një dhimbje të madhe.
“Uroj që të gjeni forcë për ta përballuar këtë dhimbje të madhe, ndërsa kujtimi për Aronin, për jetën dhe mirësinë e tij, të mbetet gjithmonë i gjallë në zemrat tuaja”, thuhet në mesazhin e ngushëllimit.
Në fund, kryetari Haliti u ka shprehur ngushëllimet më të thella familjes Pira.
