Deri më tani gjatë këtij viti në 10 lokacione të ndryshme brenda territorit të Kosovës janë kryer gërmime nga ekipet e Institutit të Mjekësisë Ligjore në kërkim të mbetjeve mortore.
Në periudhën e fundit gërmimet po zhvillohen në Burgun e Dubravës, ku dyshohet se në atë zonë nga mbetje mortore nga periudha e luftës në Kosovë.
Mirëpo nga Komisioni Qeveritar për Personat e Pagjetur, shprehen të shqetësuar se gërmime nuk po mund të kryejnë brenda territorit të Serbisë përkundër kërkesave të vazhdueshme.
“Sigurisht që sfidë shqetësuese mbesin lokacionet brenda territorit të Serbisë ku përkundër kërkesave të vazhdueshme nga ana jonë, akoma nuk është caktuar ndonjë datë për t’i rifilluar gërmimet në atë pjesë” , ka thënë Gara.
Megjithëse janë arritur disa marrëveshje në Bruksel mes Kosovës dhe Serbisë për çështjen e të pagjeturve, kjo e fundit nuk ka treguar vullnet politik për ta zbatuar.
Kryetari i Këshillit të Familjeve të të Zhdukurve, Ahmet Grajqevci, thotë se shteti fqinj Serbia e ka politizuar çështjen e personave të pagjetur dhe se sipas tij pa një trysni ndërkombëtare situata në terren nuk do të ndryshojë.
“Pavarësisht se e dimë që ka varreza masive në Serbi ne nuk kemi asgjë në dorë për të bërë. Serbia nuk e ka vullnetin për t’i hapur ato varreza sepse dëshiron ta shfrytëzojë politikisht këtë çështje”, ka thënë Grajqevci
Edhe gati 26 vjet pas përfundimit të luftës, shumë familje shqiptare janë në pritje për të kuptuar më shumë për më të dashurit e tyre.
Nga Komisioni Qeveritar i Kosovës për Personat e Zhdukur kanë kërkuar hapa konkret prej Bashkimit Evropian për ta detyruar Serbinë që të bashkëpunojë dhe t’i hapë arkivat e saj shtetërore, përfshirë ushtarake, policore dhe të inteligjencës, për të kuptuar vendndodhjen e të zhdukurve të luftës në Kosovë.
