Komandanti i KFOR-it, gjeneralmajor Özkan Ulutaş, është takuar me komandantin e Forcës së Sigurisë së Kosovës (FSK), gjenerallejtënant Bashkim Jashari.
Sipas njoftimit të KFOR-it, gjatë takimit është diskutuar për situatën e sigurisë në Kosovë, si dhe për bashkëpunimin ndërmjet KFOR-it dhe FSK-së, në përputhje me mandatin e saj fillestar.
Duke iu afruar përfundimit të mandatit të tij në mesin e tetorit, gjeneralmajor Ulutaş ka vlerësuar bashkëpunimin me FSK-në gjatë periudhës së tij në detyrë.
Ai ka rikonfirmuar gjithashtu përkushtimin e KFOR-it për ruajtjen e një mjedisi të sigurt për të gjithë njerëzit që jetojnë në Kosovë, në përputhje me mandatin e misionit të përcaktuar nga Kombet e Bashkuara.
“KFOR-i vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit që jetojnë në Kosovë dhe në lirinë e lëvizjes”, thuhet në njoftimin e KFOR-it.
Në njoftim theksohet se KFOR-i e realizon këtë mision në mënyrë të paanshme dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në kuadër të roleve të tyre përkatëse si aktorë të sigurisë./teve1.info/
