Trajneri Ronald Koeman do ta vazhdoj punën e tij te Kombëtarja e Holandës pas eliminimit nga Kampionati Evropian “Gjermania 2024”.
Holanda arriti deri në gjysmëfinale të “Euro 2024”, fazë në të cilën u eliminua nga Anglia me rezultatin e ngushtë 2:1.
Holanda tregoi paraqitje të mira në Evropian dhe të gjithë janë ndarë të kënaqur me punën e trajnerit Koeman, i cili ka kontratë deri në vitin 2026.
Koeman tashmë po mendon për Ligën e Kombeve dhe kualifikimet për Kupën e Botës 2026 derisa e ka marrë mbështetjen e të gjithëve për të vazhduar me punën.
Ai është rikthyer me ekipin të enjten mbrëma në Holandë, ndërsa ka përdorur rrjetet sociale për t’i falënderuar të gjithë ata që e përkrahen gjatë “Euro 2024”.
“Aventura jonë përfundoi dhimbshëm në gjysmëfinale por unë jam krenar me ekipin dhe përkrahjen e madhe nga tifozët që e kishim. Ne treguam se kush jemi duke e vendosur Holandën përsëri në hartë”, shkroi Koeman.
Ndeshjet e radhës, Holanda i luan në muajin shtator në kuadër të Ligës së Kombeve. Më 7 shtator përballet me Bosnjë e Hercegovinën, ndërsa tri ditë më vonë, do të ketë punë me Gjermaninë.
