Kapacitetin e prodhimit e ka të njëjtë. Por për kilovatët e shpenzuar, tashmë po paguan 300 për qind më shumë.
Nijazi Musliu, pronar i një biznesi në Ferizaj, thotë se çmimi i energjisë elektrike është vështirë i përballueshëm.
E kjo krejt si pasojë e hyrjes në treg të lirë të energjisë, ku tarifat nuk janë të rregulluara.
“Ne është dashtë me u inkuadruar në liberalizimin e tregut të energjisë elektrike dhe ngritje të çmimeve thuajse për 300% e kjo ka qenë për neve një ngarkesë tepër e madhe sepse ne më herët kemi kalkuluar me çmime të energjisë elektrike dhe produktet tona të cilat gjithçka punohet me energji, pra të gjitha makinat punojnë me energji elektrike kjo na ka rrit koston e produktit dhe nuk na bënë konkurrent me kompanitë tjera në rajon”, thotë pronari i fabrikës, Nijazi Musliu.
E ky nuk është problemi i vetëm i këtij biznesi. Së fundmi po përballet edhe me reduktime të energjisë.
“Reduktimet e energjisë elektrike kanë filluar që nga fundviti i vitit të kaluar dhe kjo po na përcjelle edhe janari e shkurtin dhe nuk dimë se kur do të merr fund kjo ndërprerje e rrymës që për neve është në të vërtetë një ngarkesë tepër e madhe na shkakton dëme të mëdha se ne kemi kontrata diku mbi 70% eksport ndërkombëtar dhe ne duhet të jemi të përpiktë me ofrimin e produkteve tona”, thotë ai.
Për këtë pronari mendon edhe largimin nga Kosova.
“Do të vjen një ditë që ne ndoshta të largohemi edhe nga tregu ose prodhimin nga Kosova krye-këputë ose të kalojmë në Shqipëri ose në ndonjë shtet tjetër të cilat na jepin edhe objektin pa qira, pra shtetet e tyre veç me punësu punëtorët e tyre”.
E që nga 1 maji, pritet të fillojë edhe faza e dytë e liberalizimit të energjisë elektrike.
“Ne fazën e dyte te liberalizimit e cila sipas vendimit te ZRRE-së nis nga muaji i ardhshëm, sipas informatave qe kemi do te dalin rreth 115 biznese ne treg te hapur. Aktualisht KESCO ka informuar konsumatoret për ketë proces”, thotë zëdhënësja e KESCO-s, Margarita Rashiti.
Por sipas Dhomës së Tregtisë i gjithë procesi i daljes në treg të hapur nuk ka qenë transparent.
“E kemi parë reduktimet që kanë ndodhur, pra nuk ka qenë rrjeti fare i përgatitur për këtë proces dhe nuk është as sot e kësaj dite as për procesin e dytë dhe ajo çka ngreh dyshime është së fillimisht ZRRE u ka thënë medieve që do të jenë 50 biznese, javën e kaluar KESCO në një deklaratë tha që neve na ka ardhur informacioni që do të jenë 113 e pardje e mora informacionin që do të jenë 140 biznese”, thotë Kushtrim Ahmeti nga Dhoma e Tregtisë dhe Industrisë.
Faza e parë e liberalizimi filloi me 1 qershor të vitit të kaluar, ku 1300 kompani kaluan me tarifa jo të rregulluara. Bizneset me mbi 50 punëtorë ose me qarkullim vjetor mbi 10 milionë euro u obliguan të blejnë energjinë sipas ofertave të kompanive privatë të licencuar për tregtim të energjisë.
