Përzgjedhësi i Kosovës në hendboll, Agron Shabani, e ka shpallur të premten listën e lojtareve për dy ndeshjet e fundit të fazës së fundit kualifikuese për “Euro 2026”.
Kombëtarja grumbullohet të dielën në Prishtinë, ndërsa gjatë javës së ardhshme e presin dy ndeshje jashtëzakonisht të vështira.
Më 9 prill nga ora 20:15 në Pallatin e Rinisë në Prishtinë është ndeshja Kosova – Franca. Ndërkohë më 12 prill nga ora 18:00 në Zagreb është ndeshja e fundit e kualifikimeve Kroaci – Kosovë.
Franca e Kroacia janë Kombëtare cilësore që u paraqitën në Botërorin e fundit. Madje Franca është prej më cilësoreve në botë.
Ndërkohë Kombëtares sonë i mungojnë shumë lojtare të rëndësishme për shkak të lëndimeve dhe obligimeve të ndryshme.
Mungojnë kapitenia Mirjeta Bytyqi, Mirela Gjikokaj, Merlinda e Elvina Qorraj, Dafina Mustafa, Elisa e Melisa Mulaj, Diona Dresh, Venera Kafexholli, Elisa Mirdita.
Shabani ka ftuar disa lojtare të reja, ndërsa disa të tjera janë kthyer në Kombëtare. Për të gjitha, ndeshjet shumë sfiduese me Francën e Kroacinë do të jenë përvojë e vlefshme për të fituar përvojë të nivelit më të lartë kontinental.
