Skuadrat nga Arabia Saudite kanë shprehur interesim për shërbimet e Granit Xhakës, kapitenit të Sunderlandit, kanë njoftuar mediumet angleze të martën.
Bëhet e ditur se janë disa skuadra saudite që po synojnë transferimin e mesfushorit 33-vjeçar me të përfunduar sezoni aktual edhe pse do të jetë mision tejet i vështirë.
Xhaka vlerësohet lart te Sunderlandi dhe skuadra angleze vështirë se do të bindet për ta liruar njërin prej lojtarëve kyç të ekipit.
Në sezonin e tij të parë me fanellën e Sunderlandit, Xhaka ka shkëlqyer në Premier League, duke u shndërruar në njërin prej mesfushorëve më të vlerësuar të kampionatit.
Megjithatë, skuadrat nga Lindja e Mesme nuk do të dorëzohen lehtë për Xhakën, pasi janë gati të paguajnë dëmshpërblim të madh për kartonin e tij.
Xhaka ka kontratë me Sunderlandin deri në vitin 2028, ndërsa këtë sezon në 30 paraqitje deri më tani në kampionatin anglez, ka shënuar 1 gol dhe ka bërë 5 asistime.
