Publicisti shqiptar, Kim Mehmeti, ka komentuar debatet për votimin e Kodit Civil në Kosovë, duke shprehur rezerva ndaj ngutjes për miratimin e tij.
Ai ka thënë se Kosova duhet ta dëshmojë orientimin e saj properëndimor përmes zhvillimit të arsimit, shëndetësisë, drejtësisë dhe respektimit të të drejtave të njeriut.
Mehmeti ka theksuar se shoqëria shqiptare njihet si konservatore dhe ka shtruar pyetjen se pse Kosova po ngutet në këtë proces.
“Ne shqiptarët njihemi si shoqëri konservatore. Nuk mund të bëhemi prijës të Evropës, duke pasur bashkëshortë të së njëjtës gjini. Nuk e di pse po ngutemi. Duam të bëhemi më properëndimorë se vetë perëndimorët. Nëse duam të bëhemi properëndimorë vetëm për prirjet seksuale, kjo është mjerim. Mendoj se nuk na duhet ky lloj ndryshimi”, ka deklaruar Mehmeti.
Ai ka thënë se shqiptarët kanë qenë tradicionalisht tolerantë ndaj homoseksualëve, ndërsa ka vënë në pikëpyetje nëse çështja e ruajtjes së familjes është ndër shqetësimet më të mëdha të Kosovës.
“Unë nuk e di kush ua ka ndaluar ose kush ua ndalon homoseksualëve të drejtat e tyre. Ne kemi qenë gjithmonë tolerantë ndaj tyre. Tashmë flasim për ruajtjen e familjes. Nuk e di nëse kjo është brenga më e madhe e Kosovës. Nuk e di pse po ngutemi kaq shumë. Unë nuk jam kundër tyre, pasi Zoti i ka krijuar të tillë”, ka thënë ai.
Ky kod pritet të kodifikojë të drejtën civile në vend duke përfshirë pronën, kontratat, marrëdhëniet familjare dhe trashëgiminë.
Mirëpo, neni i cili do të mundësonte hartimin e një ligji të posaçëm, përmes së cilit do të lejohej regjistrimi i “bashkësive civile” ndërmjet personave me gjini të njëjtë, është bërë problematik.
Në fund, Mehmeti ka theksuar se përparimi i Kosovës duhet të mbështetet në zhvillimin e institucioneve dhe në përmirësimin e kushteve të jetesës.
“Ne duhet të bëhemi properëndimorë me arsim, me shëndetësi, me drejtësi të zhvilluar dhe me të drejta njerëzore, jo me gjëra të tjera”, ka përfunduar Mehmeti.
