Publicisti Kim Mehmeti, në emisionin “Këndi i Kimit” në Tëvë1, ka folur për librin e tij të ri “Ndryshku i Kohës”, ku trajton çështjet e identitetit, historisë dhe ndryshimeve shoqërore te shqiptarët. Ai përmendi se gjatë historisë shumë shqiptarë kanë humbur identitetin kombëtar, duke u shndërruar në maqedonas ose duke u asimiluar në vende të tjera.
Sipas Mehmetit, ky proces rrezikon të vazhdojë edhe sot, pavarësisht rritjes së numrit të shqiptarëve.
“Ne në këtë kohë të re po shtohemi si popull, por po pakësohemi si shqiptarë. A e dini pse? Sepse ne shtohemi, shkojmë në Perëndim, e rritet numri i nipave e mbesave, por ata nuk e dinë gjuhën shqipe,” tha ai.
Mehmeti theksoi se humbja e gjuhës shqipe është një nga faktorët kryesorë të shuarjes së identitetit kombëtar.
“Në momentin që e humb gjuhën shqipe, humb edhe atë që të bën shqiptar. Mund të flasësh për veten se je shqiptar, por nuk mjafton vetëm ta dish që je shqiptar; duhet të dish të mendosh shqip. Dhe të mendosh shqip kur je zviceran apo kur je asimiluar diku tjetër është shumë e rëndë,” theksoi Mehmeti.
Ai shtoi se ruajtja e gjuhës dhe e kulturës është kusht themelor për mbijetesën kombëtare, sidomos në kohët kur migrimi është masiv.
