Prokuroria Themelore në Gjakovë ka kërkuar caktimin e masës së paraburgimit në kohëzgjatje prej 30 ditësh ndaj dy të pandehurve me inicialet S.S. dhe J.N., të dyshuar për veprën penale “Fajdeja”, ndërsa ndaj S.S. është ngritur dyshimi edhe për posedim të paautorizuar të municionit.
Sipas Prokurorisë, dy të pandehurit dyshohet se nga muaji gusht i këtij viti, në Rahovec, në bashkëkryerje dhe me qëllim të përfitimit të kundërligjshëm pasuror, i kanë dhënë një personi borxh duke i kërkuar në këmbim një shumë dukshëm më të madhe se shuma e marrë.
I dëmtuari E.A., sipas kërkesës së Prokurorisë, për shkak të gjendjes së rëndë financiare kishte marrë nga S.S. shumën prej 1,000 eurosh.
Fillimisht, atij dyshohet se i është kërkuar të kthente 3,000 euro, më pas 5,000 euro dhe në fund 8,000 euro.
Prokuroria thotë se i dëmtuari ishte kërcënuar se, në rast se nuk i kthente paratë, do të duhej të jepte veturën e familjes së tij.
Më 24 shtator 2026, kur E.A. u takua me S.S. për t’ia dorëzuar shumën prej 8,000 eurosh, në takim, sipas Prokurorisë, u paraqit edhe J.N.
Ky i fundit dyshohet se i tha të dëmtuarit se 500 euro nga borxhi i marrë i takonin atij dhe se shuma për pagesë ishte rritur për shkak të kamatës.
Pas dorëzimit të parave, të dyshuarit u arrestuan nga zyrtarët policorë.
Prokuroria njofton se arrestimi u bë gjatë veprimeve të koordinuara hetimore me Policinë e Kosovës dhe pas realizimit të masave të veçanta hetimore.
Paratë e pranuara nga i dëmtuari u sekuestruan.
“Me këto veprime, Prokuroria dyshon se S.S. dhe J.N., në bashkëkryerje, kanë kryer veprën penale “Fajdeja”, nga neni 331, paragrafi 1, lidhur me nenin 31 të Kodit Penal të Republikës së Kosovës”, thuhet në njoftim.
Ndërkohë, gjatë kontrollit në shtëpinë e S.S., janë gjetur dhe sekuestruar nëntë fishekë të kalibrit 7.62×39 mm.
Për këta fishekë, sipas Prokurorisë, ekziston dyshimi se S.S. nuk posedonte leje valide nga organi kompetent.
“Për këtë rast, S.S. dyshohet edhe për veprën penale “Mbajtja në pronësi, kontroll ose posedim të paautorizuar të armëve”, nga neni 366, paragrafi 1 i KPRK-së”, theksohet në njoftim.
Të dyshuarit, që nga 24 shtatori, ndodhen nën masën e ndalimit prej 48 orësh me vendim të Prokurorit të Shtetit./teve1.info/
