Prokuroria Themelore në Ferizaj ka paraqitur kërkesë në Gjykatën Themelore në Ferizaj – Departamentin për Krime të Rënda për caktimin e masës së paraburgimit prej 30 ditësh ndaj një shtetaseje italiane, e dyshuar për kryerjen e veprave penale “Blerja, posedimi, shpërndarja dhe shitja e paautorizuar e narkotikëve, substancave psikotrope dhe analoge” si dhe “Falsifikimi i parasë”.
Sipas Prokurorisë, ekziston dyshimi i bazuar se e pandehura D.G.E., më 19.11.2025, rreth orës 10:30, në pikën kufitare Hani i Elezit, në hyrje të Kosovës, ka transportuar pa autorizim substanca të ndaluara me qëllim shpërndarjeje.
Gjatë kontrollit të dytë të një autobusi të ardhur nga Shkupi, Njësia Anti-kontrabandë e Doganës, në bashkëpunim me Policinë Kufitare, ka gjetur në valixhen e të pandehurës: dy qese me methamphetamine – 24.93 g, një qese me mephodrone (MMC) – 4.20 g, një qese me pluhur narkotik të papërcaktuar – 1.78 g, një shishe qelqi me GBL – 83.96 g, një shishe tjetër me GBL – 74.84 g dhe një epruvetë qelqi të përdorur për tymosje drogash.
Sipas hetimeve, substancat dyshohet se janë transportuar nga Polonia, ndërsa të gjitha materialet janë sekuestruar nga policia.
Po ashtu, ekziston dyshimi i bazuar se e pandehura ka poseduar me vetëdije 200 euro të falsifikuara (dy kartëmonedha nga 100 €), me qëllim që t’i vërë në qarkullim si të vërteta në Kosovë. Këto kartëmonedha janë gjetur po ashtu gjatë kontrollit të valixhes dhe janë sekuestruar.
E pandehura ndodhet që nga 19 nëntori 2025 nën masën e ndalimit 48-orësh, me vendim të Prokurorit të Shtetit, për veprat penale të lartpërmendura.
