Një iniciativë e Partisë Demokratike u shtye për një periudhë tjetër kohore, pas kërkesës së Lëvizjes Vetëvendosje.
Bëhet fjalë për iniciativën që kryetarja e Dhomave të Specializuara të Kosovës, Ekaterina Trëndafilova të raportojë para Kuvendit të Republikës së Kosovës për punën e këtij institucioni.
Me kërkesë të deputetes së LVV-së, Shqipe Selimi, iniciativa u shtyre deri sa Specialja të nxjerrë aktgjykimin në rastin e ish-krerëve të UÇK-së.
Ky vendim po vlerësohet edhe nga njohës të drejtësisë, pasi në këtë mënyrë nuk rrezikohet procesi.
“Nuk parashihet asnjë despozitë se kujt i raporton kjo Gjykatë, pavarësisht se në letra është e Kosovës. Shto këtu faktin se, momentumi që është aktualisht është jashtëzakonisht delikat për aq kohë sa presim vendimin. Besoj që duke qenë se është e vonuar, më mirë që nuk është realizuar si nismë e tillë se sa që me u realizu në këtë fazë të procesit, sepse do të mund të konsiderohej si interferim në punën e kësaj Gjykate”, ka thënë Bajraktari.
Një raportim i tillë, kurdo që të bëhet, po konsiderohet si shumë i rëndësishëm bazuar në punën e Speciales ndër vite dhe shkeljet e pretenduara që janë bërë përgjatë kësaj kohe.
“Ka qenë shumë i rëndësishëm raportimi i Trëndafilovës në Kuvend, për shkak se përgjatë procesit kanë ndodhë shumë shkelje, shumë padrejtësi ndaj krerëve të UCK-së, dhe kish me qenë shumë e rëndësishme me u ballafaqu në Kuvend me deputetët, me pyetjet e deputetëve dhe me dhanë sqarime se pse kanë ndodhë këto vonesa, pse kanë ndodhë këto padrejtësi”, u shpreh Qeriqi.
Për shkak të kompleksitetit të mënyrës së si është themeluar dhe funksionon Gjykata Speciale, kryetarja e saj, Ekaterina Trendafilova asnjëherë nuk ka raportuar para ndonjë institucioni të Republikës së Kosovës. Megjithatë, ka mbajtur disa takime informuese me shoqërinë civile dhe gazetarë.
