Kryeshefi ekzekutiv i KEK-ut, Gramos Hasani në një konferencë për media ka bërë të ditur se nuk do të ketë ndërprerje të energjisë elektrike, pas raportimeve për mungesë të prodhimit vendor të energjisë elektrike.
Hasani ka deklaruar se ka pasur pasiguri nga ekipi i termocentralit “Kosova A” për të deklaruar kapacitetet.
“Nuk do të ketë ndërprerje të energjisë elektrike, këtë ta kemi të qartë. Ne sot kemi deklaruar kapacitetet e prodhimit të cilat i kemi planifikuar për nesër. Ka pasur pasiguri nga ekipi i termocentralit ‘Kosova A’ për ta deklaruar atë kapacitet. Kjo është keqkuptuar dhe janë dhënë deklarata të ndryshme, me të cilat ne nuk merremi, që KEK-u për herë të parë pas 25 vjetësh nuk prodhon asnjë megavat brenda ditës. Kjo nuk është e vërtetë. Ne jemi angazhuar maksimalisht dhe kemi bërë korrigjim të kapaciteteve që njësia A3 do të prodhojë edhe nesër”, deklaroi kryeshefi.
Ndryshe, KESCO sot ka paralajmëruar se nga nesër e në ditët në vijim pritet të nisë një mungesë e theksuar e prodhimit vendor të energjisë, duke u kërkuar qytetarëve të kursejnë në shfrytëzimin e energjisë elektrike. Mirëpo, lajmin e ka mohuar KEK, duke thënë se operimi po vazhdon normalisht dhe se nuk ka kolaps në prodhim./teve1.info/
