Instituti Demokratik i Kosovës (KDI) ka shprehur shqetësim për mënyrën se si Komisioni për Legjislacion ka nisur shqyrtimin dhe votimin në parim të pakos së projektligjeve për reformën në drejtësi.
Sipas KDI-së, procedura është zhvilluar në kundërshtim me disa dispozita të Rregullores së Punës së Kuvendit.
Instituti ka theksuar se deputetët i kanë pranuar projektligjet dhe materialet përcjellëse, të cilat përmbajnë qindra faqe, vetëm mbrëmjen e kaluar, ndërsa sot janë ftuar t’i shqyrtojnë dhe votojnë ato në parim.
KDI ka rikujtuar se neni 34 i Rregullores përcakton që, përveç rasteve të veçanta, mbledhjet e komisioneve duhet të thirren së paku tri ditë pune para mbajtjes së tyre.
Sipas Institutit Demokratik, për procedimin e përshpejtuar të kësaj pakoje nuk është dhënë paraprakisht ndonjë arsyetim.
Po ashtu, KDI ka theksuar se Rregullorja parasheh që leximi i parë i projektligjeve në seancë plenare zhvillohet vetëm pasi të kenë kaluar dy javë nga shpërndarja e tyre tek deputetët.
Sipas organizatës, kjo kohë do t’i mundësonte Komisionit që të zhvillonte shqyrtimin në përputhje me procedurat e rregullta.
KDI ka kritikuar gjithashtu faktin që projektligjet u votuan pa prezencën e ministres përgjegjëse.
Organizata ka vlerësuar se, për shkak të rëndësisë së pakos për reformën në drejtësi, ministrja do të duhej t’i prezantonte propozimet dhe t’u përgjigjej pyetjeve të deputetëve.
Në deklaratën e saj, KDI i ka cilësuar projektligjet të rëndësishme për avancimin e integritetit, performancës dhe llogaridhënies në sistemin e drejtësisë.
Organizata ka kërkuar që fazat e mëtejshme të shqyrtimit të zhvillohen pa nguti, në përputhje me Rregulloren e Kuvendit dhe me përfshirjen e akterëve relevantë./teve1.info/
