Katari ka reaguar publikisht ndaj zhvillimeve të fundit në konfliktin mes Shteteve të Bashkuara, Izraelit dhe Iranit, përmes deklaratave të zëdhënësit të Ministrisë së Jashtme, Majid al-Ansari, i cili theksoi sfidat serioze me të cilat po përballet rajoni.
Sipas tij, sistemi rajonal i sigurisë në Gjirin Persik është tronditur ndjeshëm si pasojë e përshkallëzimit të luftës.
Duke folur për mediat ndërkombëtare si Al Jazeera dhe BBC, al-Ansari deklaroi se situata mbetet e paqëndrueshme dhe se Katari ndodhet “në qendër të stuhisë”.
Ai theksoi rëndësinë e marrëdhënieve të ngushta mes popujve të Katarit dhe Iranit, duke i cilësuar ato si “vëllazërore” dhe duke nënvizuar se këto lidhje duhet të kenë përparësi mbi çdo konsideratë politike në këtë periudhë të tensionuar.
Në lidhje me rolin diplomatik të Katarit, al-Ansari sqaroi se nuk ka ndërmjetësim të drejtpërdrejtë mes Shteteve të Bashkuara dhe Iranit.
Ai shtoi se vendimi i SHBA-së për të hyrë në luftë është marrë mbi bazën e vlerësimeve të veta strategjike.
Megjithatë, Katari po bashkëpunon ngushtë me administratën e Trumpit për të ulur tensionet dhe për të parandaluar përshkallëzimin e mëtejshëm të konfliktit, përfshirë ndalimin e sulmeve iraniane ndaj territorit të tij.
Zëdhënësi bëri të ditur se, që nga e enjtja e kaluar, nuk janë regjistruar sulme me raketa apo dronë nga Irani drejt Katarit. Megjithatë, ai paralajmëroi se rreziku vazhdon të jetë i pranishëm.
“Qëndrimi ynë është mbrojtës,” tha ai, duke shtuar se Katari ka përballuar më shumë se 200 sulme me dronë, prej të cilëve mbi 90% janë neutralizuar me sukses.
Al-Ansari nënvizoi gjithashtu se vendi rezervon të drejtën për t’u përgjigjur ndaj këtyre sulmeve, por deri më tani nuk është marrë asnjë vendim për hakmarrje.
Sa i përket bazës ajrore amerikane al-Udeid, më e madhja në Lindjen e Mesme, ai theksoi se nuk është diskutuar fare mundësia e mbylljes së saj, pavarësisht tensioneve aktuale në rajon./teve1.info/
