Kandidati për deputet nga radhët e Lidhjes Demokratike të Kosovës, Gëzim Kasapolli, ka deklaruar se subjekti i tij politik jo vetëm që do ta mposhtë Lëvizjen Vetëvendosje në zgjedhjet e 28 dhjetorit, por do ta dërgojë atë në një opozitë nga e cila, sipas tij, nuk do të kthehet më në pushtet.
Në emisionin “Info Nata” në Tëvë1, Kasapolli ka thënë se këtë synim do ta arrijnë falë ofertës qeverisëse të LDK-së, të cilën e cilësoi si shumë të qëndrueshme.
Sipas tij, LDK-ja ka aspiratë dhe bagazh të mjaftueshëm politik për të dalë partia e parë në zgjedhje.
“Ne jo vetëm që do ta mposhtim Kurtin, por do ta dërgojmë në opozitë nga e cila nuk do të kthehet më në pushtet, sepse oferta jonë është aq e qëndrueshme sa mund t’u bëjë ballë edhe ndryshimeve tektonike që po ndodhin në botë. Ne jemi të përgatitur për to. Ne kemi aspiratë dhe bagazh të mjaftueshëm për të dalë partia e parë, por në fund të fundit është sovrani ai që vendos por detyra jonë është krijimi i një oferte serioze qeverisëse”, ka thënë Kasapolli.
Ai ka theksuar se me LDK-në Kosova do të jetë pjesë e tavolinës së bisedimeve ndërkombëtare, ndërsa me Albin Kurtin, sipas tij, vetëm pjesë e “menysë”.
“Unë e kam një shprehje: a do të jetë Kosova në tavolinën e bisedimeve apo në meny. Me Kurtin, Kosova do të jetë në meny, ndërsa me ne do të jetë pjesë e tavolinës. Mos të harrojmë se gjatë 4–5 viteve të fundit ministrja e Punëve të Jashtme dhe kryeministri nuk janë pritur në asnjë takim bilateral, duke u bërë persona të padëshirueshëm. Kjo ndikon edhe në mbylljen e tregut, sepse politika dhe diplomacia nuk janë të shkëputura nga ekonomia. Si mund t’i thuash një investitori të huaj të vijë të investojë në Kosovë, kur gjatë gjithë kohës flitet për rreziqe dhe luftë? Prandaj mendojmë se kjo nuk është mënyra e duhur dhe duhet të ndalet më 28 dhjetor”, ka shtuar ai.
Kasapolli ka komentuar edhe deklaratën e kryeministrit Albin Kurti, i cili kishte thënë se po të ishte gjallë ish-presidenti Ibrahim Rugova, nuk do të refuzonte bashkëpunimin me të.
Sipas Kasapollit, po të ishte gjallë Rugova, Kurti as nuk do të kishte rastin të fliste me të dhe do të mbetej një lëvizje minorene dhe e parëndësishme në Kosovë.
“Po të ishte gjallë Ibrahim Rugova, Albin Kurti do të ishte një lëvizje minorene dhe e parëndësishme në Kosovë. Ai as nuk do të kishte rastin të fliste me Rugovën. Rugova dhe Kurti janë dy antipode në botëkuptime: njëri reformator që e solli Kosovën deri te pavarësia, tjetri me një botëkuptim të vjetër ideologjik”, ka deklaruar Kasapolli./teve1.info/
