Ish-kryenegociatorja e Kosovës në dialogun me Serbinë, Edita Tahiri e cilëson naive dhe të papjekur deklaratën e ministrit në detyrë të Bujqësisë, Faton Peci, lidhur me procesin e gjykimit në Hagë dhe protestave që janë mbajtur atje në mbështetje të tyre.
Peci në Tëvë1 deklaroi se forma e organizimit të protestave mund të ketë efekt të kundërt ndaj procesit gjyqësor që po zhvillohet ndaj ish-krerëve të UÇK-së.
Madje, tha se disa pamje nga protesta nuk i kanë lënë përshtypje pozitive.
Për këtë, Tahiri tha qeveria në detyrë është dashur t’i mbrojë çlirimtarët e popullit të Kosovës.
“Deklaratë naive, e papjekur. Sepse, Gjykata Speciale është gjykatë e Kosovës, e votuar në Parlament. Shteti i Kosovës e ka Ministrinë e Drejtësisë dhe kjo Ministri u desh më bë çmos dhe maksimumin për të vepruar që kjo Gjykatë Speciale as të mos vonohet dhe të vendos drejtësi. E di të nuk i kanë mbuluar shpenzimet, ka pas largim të avokatëve. Këto janë obligime shtetërore të Kosovës. Nuk i bëri as Ministria e Drejtësisë, as lidershipi politik. Qeveria duhet me veprua në mbrojtje të çlirimtarëve, të popullit të Kosovës”, deklaroi ajo në emisionin “Mesditë” në Tëvë1
Ndërkohë, potencoi që qeveritarët kanë dështuar në mbrojtjen e ish-krerëve të UÇK-së.
“Qeveritarët kanë dështuar në detyrën e tyre qeveritare dhe kombëtare, në mbrojtje të gjithë këta që janë sot në Gjykatë”, deklaroi ajo.
Peci: Pamjet nga protesta në Hagë nuk më pëlqyen, mund të ndikojnë negativisht
