Kryediplomatja e Bashkimit Evropian, Kaja Kallas, i ka bërë thirrje Izraelit të ndalojë planin e tij të ndërtimit të vendbanimeve E1 në Bregun Perëndimor të pushtuar.
Javën e kaluar, qeveria izraelite publikoi një tender për ndërtimin e më shumë se 1,200 njësive të banimit, që do të ndanin veriun e Bregut Perëndimor të pushtuar nga jugu.
Kallas tha se projekti do të dëmtonte rëndë perspektivat për një zgjidhje me dy shtete., shkruan Al Jazeera.
Në një deklaratë, ajo i kërkoi qeverisë izraelite të tërheqë tenderin dhe të ndalojë të gjitha projektet e tjera të zgjerimit të vendbanimeve.
E1 (Lindja 1) do të lidhë Ma’ale Adumim dhe vendbanime të tjera të paligjshme izraelite me Jerusalemin Lindor të pushtuar, duke e ndarë në mënyrë efektive Bregun Perëndimor në dy pjesë.
OKB-ja paralajmëron se zgjerimi i planifikuar i vendbanimeve të paligjshme izraelite dhe infrastrukturës përkatëse kërcënon të copëtojë Bregun Perëndimor të pushtuar dhe mund të zhvendosë me forcë 18 komunitetet palestineze që kanë jetuar brenda territorit që Izraeli tani e pretendon për dekada të tëra.
