Më 10 tetor të vitit 2025, Nenad Rashiq nga komuniteti serb u zgjodh nënkryetar i Kuvendit të Kosovës.
Kjo ndodhi pas dështimeve të njëpasnjëshme për të zgjedhur nënkryetar, një nga nëntë deputetët e Listës Serbe.
Mirëpo, këtë votim e ka rrëzuar Gjykata Kushtetuese.
Sipas njoftimit për vendim, Kushtetuesja ka theksuar se nënkryetar nga komunitetet duhet të zgjedhet një deputet që siguron edhe shumicën e votave të përfaqësuesve të komunitetit të tij në Kuvend.
Në këtë rast, nënkryetar serb i Kuvendit, sipas Kushtetueses, duhet të zgjedhet dikush që i siguron shumicën e votave të deputetëve serb.
Këtë vendim e ka kundërshtuar Lëvizja Vetëvendosje.
Megjithatë, sipas ish-kryetarit të Gjykatës së Apelit, Hasan Shala, deputetët vepruan qartësisht në kundërshtim me rregulloren e Kuvendit, kur e votuan Rashiqin nënkryetar.
“Ka pas shkelje procedurale lidhur me emërimin apo zgjedhjen e nënkryetarit të komunitetit e Kuvendit të Kosovës, Nenad Rashiq për arsyeje se është propozuar nga kryetari i Kuvendit të Kosovës, Dimal Basha. Andaj ky propozim ka qenë kundër rregullores së Kuvendit të Kosovës e cila rregullore e miratuar nga shumica e deputetëve të VV-së , mirëpo këtyre nuk po iu pëlqen me zbatua dhe e shkelin vet rregulloren” , shprehet Shala.
Përkundër kundërshtive, Shala thotë se vendimi duhet të respektohet.
“Të gjitha institucionet e Kosovës duhet të zbatojnë vendimin e Gjykatës Kushtetuese, çështja se pse ky ka dalë e ka kundërshtuar, unë konsideroj se është gabim i madh i tij për arsyeje se vendimet e Gjykatës Kushtetuese janë vendime përfundimtare”, shprehet ish-kryetarit të Gjykatës së Apelit.
Ndërkaq, avokati Arbër Jashari, vlerëson se vendimi i Kushtetueses, mund ta favorizoj Listën Serbe.
“Është fakt i njohur se Lista Serbe e ka uzurpuar përfaqësimin e serbëve të Kosovës në Kuvend duke qenë se i ka marrë shumicën e mandateve në këtë komunitet në legjislaturën e kaluar që i ka pas 9 mandate. Dhe, ky vendim i Gjykatës mund t’i favorizon ata por duhet të thënë se Gjykata Kushtetuese është për t’i mbrojtur parimet dhe nuk guxon të bëjë interpretimin e Kushtetueses pavarësisht rrethanave të kohës apo politikave”, vlerëson Jashari.
Tëvë1 ka provuar gjatë gjithë ditës që të marrë një qëndrim nga Lëvizja Vetëvendosje, mirëpo ata nuk janë përgjigjur.
