Aktori i njohur, Johnny Depp ka folur së fundmi për marrëdhënien e tij me ish-bashkëshorten Amber Heard dhe për përvojën e vështirë të procesit gjyqësor për shpifje, në një intervistë për “The Sunday Times”, më shumë se tre vjet pas vendimit të gjykatës.
Depp tregoi se si marrëdhëniet e tij të hershme e kanë formuar mënyrën se si ai e percepton dashurinë dhe se si kjo ndikoi edhe në lidhjen e tij me Amber Heard.
“Si ishin marrëdhëniet e mia të para me atë që ne e quajmë dashuri? Sigurisht, të paqarta. Dhe kur je një njeri naiv si unë, ndonjëherë sheh në sytë e dikujt trishtim, vetmi dhe mendon se mund ta ndihmosh”, tha aktori.
Ai vijoi duke theksuar:
Asnjë vepër e mirë nuk mbetet pa u ndëshkuar. Sepse ndodh që kur përpiqesh t’i duash dhe t’i ndihmosh të tjerët, ata fillojnë të shfrytëzojnë atë dobësi që ke parë tek ta. Dhe kjo shfaqet në mënyra të tjera. Për mua, kjo ishte një pjesë e jetës sime që vendosa ta zbuloja më tej.
Depp dhe Heard u divorcuan në vitin 2016, pasi aktorja paraqiti kërkesën duke përmendur “dallime të papajtueshme” dhe akuzoi aktorin për dhunë në familje, duke kërkuar edhe një urdhër mbrojtjeje të përkohshëm.
Ndonëse ata arritën një marrëveshje divorci me vlerë 7 milionë dollarë, në vitin 2019 Depp e paditi Heard për shpifje, pas një artikulli të publikuar në “Washington Post” ku ajo fliste për përvojat e saj me dhunën dhe diskriminimin.
Duke reflektuar mbi betejat e zgjatura ligjore, Depp tha:
“Të gjithë më thoshin ‘do të kalojë’. Por si mund të kalojë? Një gënjeshtër e shpalosur para gjithë botës nuk kalon thjesht. Nëse nuk përpiqem të tregoj të vërtetën, do të duket sikur jam fajtor për atë që më akuzojnë. Dhe fëmijët e mi, fëmijët e tyre, fëmijët që kam takuar në spitale do të duhet të jetojnë me këtë njollë”.
Ai përmendi gjithashtu zhgënjimin ndaj atyre që e lanë në baltë në momentet më të vështira:
“Këta njerëz kanë qenë pjesë e jetës sime, kanë marrë pjesë në festat e fëmijëve të mi. E kuptoj që ndonjëherë frika i ka ndalur të marrin anën e duhur, por kjo nuk e justifikon tradhtinë”, u shpreh ai./TAR
