Një grua nga Los Angeles, e njohur si “Mbretëresha e Ketaminës”, është dënuar me 15 vjet burg pasi shiti drogë që çuan në vdekjen e aktorit të serialit “Friends”, Matthew Perry.
Jasveen Sangha, 42 vjeçe, u deklarua fajtore për pesë akuza, përfshirë shpërndarjen e ketaminës që rezultoi në vdekje ose lëndim trupor.
Prokurorët e përshkruan shtëpinë e saj në Hollywood-in verior si një “qendër për shitje droge”, ku u furnizonin klientë të pasur dhe me lidhje.
Matthew Perry u gjet i vdekur në tetorin e vitit 2023 në xhakuzin e shtëpisë së tij në Los Angeles, ndërsa autoritetet konstatuan se vdekja e tij u shkaktua nga efektet akute të ketaminës.
Sangha pranoi para gjykatës se vendimet e saj kishin shkatërruar jetë njerëzish dhe shprehu keqardhje, por gjyqtari theksoi mungesën e pendesës së saj në vitet pas arrestimit, raporton BBC, përcjell KosovaPress.
Njerka e të ndjerit Matthew, Debbie Harry, kërkoi nga gjykata dënimin maksimal me burg për këtë akt.
“E ke shkaktuar këtë. Ti që kishe talent për biznes dhe mjaftueshëm aftësi për të fituar para, zgjodhe mënyrën e vetme që i dëmton njerëzit”, tha ajo në deklaratën për ndikimin e viktimës të dorëzuar në gjykatën e Kalifornisë të martën.
Hetimet federale zbuluan qindra doza ketamine dhe mijëra pilula të drogave të tjera në banesën e saj, ndërsa ajo akuzohet se kishte furnizuar drogë edhe për viktima të tjera.
Rasti i Perry-t përfshin gjithsej pesë persona të akuzuar për furnizim me ketaminë, përfshirë mjekë dhe bashkëpunëtorë të tij personal, të cilët gjithashtu kanë pranuar fajësinë dhe janë dënuar ose presin dënimin.
