“Kur ushtria serbe të kthehet në Kosovë”
Ky mbishkrim fillimisht u shfaq në një ndeshje futbolli nga tifozët e klubit Crvena Zvezda.
Njëzëri tifozët serbë kërkuan kthimin e ushtrisë serbe në Kosovë.
Grafite të tilla filluan të shfaqeshin edhe në disa lokacione të ndryshme në kryeqytetin e Serbisë.
E publicisti nga Beogradi, Dushan Janjiq, tregon se kush fshihet mbrapa këtyre mbishkrimeve në Serbi.
“Prej vitesh në Beograd mund të shihen grafite të tilla ekstreme. Mbrapa këtyre grafiteve fshihen grupet e ekstremit të djathtë në Serbi, të cilat influencohen direkt edhe nga Moska. Këto grafite me mesazhe të tilla janë edhe si shenjë revolte ndaj intervenimit të NATO-s në Serbi gjatë vitit 1999. Ndonëse nuk e kanë thënë publikisht, këto grafite janë mbështetur në heshtje nga elita aktuale politike në Serbi. Megjithatë, ata që i shkruajnë këto grafite nuk janë aq të guximshëm për të bërë këso lëvizje të çmendura, duke kërkuar kthimin e ushtrisë së Serbisë në Kosovë”, deklaroi Janjiq për Tëvë1.
Por Janjiq, thotë se edhe në Prishtinë po ka provokime nga Kryeministri i Kosovës, Albin Kurti.
Ai këtu nënvizon vizitën e Kryeministrit kosovar në Tetovë.
“Lëvizjet e fundit të Kryeministrit të Kosovës, Albin Kurti, kanë ngjallur reagime në Beograd. Vizita e tij në Tetovë ose te them më mirë shfaqja e tij atje, ju dha shkas nacionalistëve këtu të thonë se Kurti po punon për krijimin e ‘Shqipërisë së Madhe’”, tha ai.
Presidenti i Serbisë, Aleksandër Vuçiq, ende nuk i ka komentuar grafitet ku bëhet thirrje që ushtria serbe të kthehet në Kosovë.
Përndryshe, në Beograd dhe në qytete të tjera të Serbisë ka me dhjetëra vizatime që u dedikohen kriminelëve të luftës.
