Ish-Presidentja e Kosovës, Atifete Jahjaga, mori pjesë në edicionin e 9-të të Forumit Botëror të Paqes, që po mbahet në Jakarta, Indonezi.
Me ftesë të veçantë, Jahjaga mbajti një fjalim të rëndësishëm ku theksoi vlera të rëndësishme për paqen dhe zhvillimin global, duke përfshirë demokracinë, barazinë gjinore, gjithëpërfshirjen dhe lidershipin e gruas.
Në fjalën e saj, Jahjaga u ndal në rëndësinë e forcimit të institucioneve demokratike dhe promovimit të barazisë gjinore, vlera që janë pjesë e rrugëtimit të saj personal dhe institucional.
Ajo theksoi gjithashtu ngritjen dhe ringritjen e Republikës së Kosovës pas luftës, duke ndarë me krenari eksperiencat e saj si Presidentja e parë grua e Kosovës dhe sfidat që ka kaluar vendi gjatë periudhës post-luftës.
“Kontributi im për Kosovën ka kaluar faza dhe pozita të ndryshme institucionale, por gjithmonë me të njëjtin qëllim të mirën e përgjithshme të qytetarëve të vendit”, tha Jahjaga, duke folur për angazhimin e saj të vazhdueshëm për zhvillimin dhe stabilitetin e Kosovës.
Një pjesë e rëndësishme e fjalës së Jahjagës ishte kërkesa për njohjen e Kosovës nga Indonezia, një hap që ajo e cilësoi si të domosdoshëm për forcimin e mëtejshëm të paqes dhe stabilitetit në rajon.
Ajo theksoi se një Kosovë e njohur dhe e mbështetur globalisht do të kishte një ndikim pozitiv në forcimin e bashkëpunimit dhe marrëdhënieve me shtetet e tjera.
“Kosova, si një shtet i sovran dhe i pavarur, ka kontribuar në forcimin e paqes, stabilitetit dhe progresit në rajon. Ne meritonim të njihemi dhe mbështetemi nga bashkësia ndërkombëtare”, u shpreh Jahjaga.
Në përmbyllje të fjalës së saj, Jahjaga riafirmoi angazhimin e saj të palëkundur për vendin dhe të ardhmen e tij të ndritur, duke thënë se do të vazhdojë të punojë për mirëqenien e Kosovës dhe qytetarëve të saj.
