Ushtria izraelite u ka thënë njerëzve në Iran të mos përdorin trenat ose të mos i afrohen linjave hekurudhore, duke treguar se synon të sulmojë infrastrukturën civile përpara se të skadojë afati i Presidentit të Shteteve të Bashkuara Donald Trump për të hapur Ngushticën e Hormuzit .
“Për hir të sigurisë suaj, ju lutemi që nga ky moment deri në orën 21:00 sipas orës iraniane të përmbaheni nga përdorimi dhe udhëtimi me tren në të gjithë Iranin”, shkroi ushtria në X.
“Prania juaj në trena dhe pranë linjave hekurudhore rrezikon jetën tuaj”, shtoi ajo në llogarinë e saj në gjuhën persiane.
Pas kërcënimeve izraelite, udhëtimi me tren për në dhe nga qyteti i dytë i Iranit, Mashhad, u anulua deri në njoftim të mëtejshëm, sipas guvernatorit Hassan Hosseini, i cili u citua nga mediat lokale, shkruan Al Jazeera.
“Për shkak të paralajmërimit imoral të regjimit sionist në lidhje me sulmin ndaj hekurudhave të vendit dhe me qëllim që të tregohet kujdes, të gjitha lëvizjet e trenave nga Hekurudha e Mashhadit janë anuluar deri në njoftim të mëtejshëm”, tha Hosseini.
Presidenti i SHBA-së, Donald Trump, kishte kërcënuar të bombardonte urat dhe termocentralet e Iranit nëse Irani nuk rihap Ngushticën e Hormuzit të martën në orën 8 të mbrëmjes.
Irani, nga ana tjetër, ka kërcënuar me hakmarrje “shkatërruese” nëse goditet infrastruktura civile e vendit.
