Meriton Ismaili është një nga lojtarët më perspektiv të Superligës së Kosovës në Basketboll.
Ismaili tashmë ka filluar një aventurë të re, 23-vjeçari në sezonin 2023-2024 do të bartë fanellën e kampiones në fuqi, Pejës. E pse iu bashkua Pejës, Ismaili tregon për Tëvë1.
“Arsyeja pse jam pjesë e KB Peja është sepse ka një ekip shumë të mirë me lojtarë që janë prej më të mirëve në ligë dhe më janë ofruar kushte shumë të mira. Klubi ka qenë shumë konkret në të gjitha aspektet, gjë që mua më bën të jem shumë serioz dhe ta shpërblej besimin e dhënë. Vet organizimi i klubit tregon që synimet janë të mëdha të luftojmë për trofe dhe në garat evropiane, normalisht duke zhvilluar ndeshje të mira dhe duke treguar formë stabile.”
Reprezentuesi i Kosovës tregon dhe për ofertat që ka pasur në këtë merkato verore.
“Normal kam pasur oferta të ndryshme por është vërtëtë e rëndësishme për mua të ndihesha mirë aty ku do të të shkoja dhe KB Peja ishte ajo që ma dha këtë. Më kanë bërë të ndihem mirë kjo është gjëja më e rëndësishme për mua është një hap i madh përpara. Klubi vjen i pari dhe pastaj unë do të përpiqem të ndihmoj ekipin me të gjitha mundësitë që kam.”
Ai nuk kursehet nga vetja as për Kosovën dhe shpreson që me ekipin përfaqësue të arrijnë sa më lartë.
“Synimet janë si gjithmonë të shkojmë sa më lart pse jo këtë vit synojmë të kalojm grupin. Së pari duhet ta bëjmë një fazë shumë të mirë përgatitore që të jemi të gatshëm që ta dërgojmë përfaqesuesen tonë sa më lartë. Grupi është shumë i fortë sepse edhe ata kanë një ekip shumë të mirë dhe cilësor, por ne jemi të kompletuar synimet janë të fitojmë ta bëjmë historinë.”
Prishtinasi edicionin e kaluar ishte pjesë e skuadrës së Ponte Prizrenit ndërsa ka përvojë dhe te skuadra e Sigal Prishtinës. /Teve1/
