E mërkura e gjeti në oborrin e gjimnazit “Frang Bardhi” në Mitrovicë.
E një lule, Sabrije Nimani, me dhimbje e la tek kjo karrige e zbrazur.
Në të, figuron emri i nënës së burrit të saj, Havës.
Kjo e fundit, është në mesin e 104 personave të pagjetur nga komuna e Mitrovicës së Jugut.
27 vite pas ngjarjeve tragjike, Sabrije Nimani thotë se shpresa po e mban të fortë.
“Shumë e rëndë e njëjta dhimbje nuk freskohet hiç deri sa të gjinden eshtrat e saj. Jemi të mërzitur shumë. Po mundohen, inshalla do Zoti deri në fund t’i gjejmë këto mbetje ku janë e me i sjellë në vendin e vet, ne atëherë na lirohet pak a shumë dhimbja”, ka thënë Nimani.
Ditën e Bajramit të vitit 1999, me dhimbje e kujton edhe Rushit Fejzullahu.
“E kam nënën, babën, motrën edhe nipin. Ishte ditë bajrami ajo ditë që na kanë largu nga ndërtesat se unë kam qenë në ndërtesë, por babën nënën edhe motrën i kam pas këtu, e më kurfar kontakti nuk kam pasur me ta. Më rëndë a ka diçka, mu tani po më vjen më rëndë prej popullit që po kapën përqafe me serbë, nuk po di si mos më pas ndodh kurgjo, ajo më së shumti po më bren mua tash”, u shpreh Fejzullahu.
Tmerrin e 15 prillit të vitit 1999, nuk e ka harruar as Bujar Sahiti, atëkohë 17 vjeçar.
“Serbët na kanë tubuar në shtëpinë e mixhës tem na kanë malltretuar gjithçka na kanë bërë. Na e kana ndal këtu babën, djalin e axhës, edhe axhën por atë e kanë liruar. Edhe na kanë largu nga shtëpia na kanë rrahur, na kanë marr gjithçka çka kemi pas. Babin e kam gjetur në 2013 në varrezat lartë, djalin e axhës në oborr të Bajram Rexhepit, edhe një tezak të babait ende se dimë ku është”, ka thënë Sahiti.
Në ditën e të pagjeturve në këtë komunë, drejtësi kërkoi edhe Fevzi Beqiri.
“Ky muze gjendet këtu në mesin e kriminaleve që i kemi përreth këtu, me shpija e me këto ndërtesa. Po ky gjak që është derdhë ne që jemi të gjallë, banorët, institucionet edhe lokale dhe qendrore e kanë obligim që me hulumtuar rastin se si kanë vdekur e si janë masakruar këta këtu që i pasqyrojmë” theksoj Beqiri.
Ndryshe, në këtë shtëpi në Lagjën e Boshnjakëve në Mitrovicë, me datën 15 prill të ‘99-ës forcat serbe vranë 23 civilë shqiptarë.
