Kur Vedat Muriqi ende nuk ishte emër i njohur i futbollit evropian, një prej ish-selektorëve të Kosovës kishte dalluar tek ai potencial që pak kush e kishte vërejtur.
Ish-selektori i Kosovës, Albert Bunjaki, ka kujtuar kohën kur sulmuesi luante në nivelin e dytë të futbollit turk. Mënyra e tij e lojës dhe karakteristikat e veçanta si sulmues ishin vërejtur që në atë periudhë.
Muriqi pos që luante në kategorinë e dytë të futbollit turk paraqitej edhe për Shqipërinë U21.
Bunjaki besonte se një sulmues me kombinimin e forcës fizike dhe teknikës ishte një profil i rrallë në futbollin evropian.
55-vjeçari të martën në një intervistë për “Turkiye Gazetesi”, ka thënë se potencialin e Muriqit e kishte dalluar që në ditët e para.
“Kur u bëra selektor i Kosovës një nga qëllimet tona ishte të kishim dy sulmues të fortë fizikisht, të gjatë dhe teknikisht të talentuar, të cilët do të garonin për një vend në ekip. Në atë kohë, Vedati luante në divizionin e dytë turk dhe kishte përfaqësuar ekipin kombëtar të Shqipërisë U21. Megjithatë, menjëherë e dallova potencialin e tij. Besoja se ky lloj sulmuesi ishte jashtëzakonisht i rrallë në futbollin evropian dhe koha e ka vërtetuar saktësinë e vlerësimit tim. Sot, Vedati është padyshim një nga sulmuesit më të mirë në futbollin evropian”, ka thënë Bunjaki.
Bunjaki e drejtoi Kosovën nga viti 2009 deri në vitin 2017.
32-vjeçari Muriqi u kthye te Fenerbahçe pas shkëlqimit te Mallorca.
Bunjaki është i bindur se kthimi i Muriqit te Fenerbahçe do të rezultojë i suksesshëm.
Ai thotë se qendërsulmuesi do t’i realizojë të paktën 20 gola përgjatë edicionit 2026/27.
“Për Vedatin, suksesi i ekipit ka ardhur gjithmonë para arritjeve individuale. Ai është lojtar i pjekur që nuk ndjek statistikat personale. Është mjaft i zgjuar për të mos ushtruar presion të panevojshëm mbi veten. Nëse do t’ia bënit këtë pyetje, ai ndoshta do të thoshte se numri i golave që shënon është i parëndësishëm për sa kohë që Fenerbahçe fiton. Ky mentalitet pasqyron si pjekurinë e tij ashtu edhe përkushtimin e tij ndaj ekipit. Si dikush që ka punuar me të edhe në aspektin e stërvitjes mendore, nëse nuk pëson ndonjë dëmtim ai do ta përfundojë sezonin midis tre golashënuesve më të mirë në Superligën e Turqisë. Nëse do të më duhej të jepja një numër, besoj se ai ka kapacitetin të shënojë të paktën 20 gola”.
Muriqi është sulmuesi më i mirë i Kosovës me 32 gola në 68 paraqitje.
