Kryenegociatori dhe Kryetari i Parlamentit iranian, Mohammad Bagher Ghalibaf tha se Irani refuzon negociatat me SHBA-në “nën hijen e kërcënimeve”
Ghalibaf kritikoi ashpër presidentin e SHBA-sw, Donald Trump për vendimin për bllokadë në Ngushticën e Hormuzit, të cilën Teherani e quan shkelje të armëpushimit.
Në platformën X, ai tha se Trump po përpiqet t’i kthejë bisedimet “në një tryezë dorëzimi ose për të justifikuar luftënxitje të re” dhe paralajmëroi për opsione të reja ushtarake nëse armëpushimi dyjavor skadon.
Trump njoftoi të dielën se përfaqësuesit e SHBA-së do të fluturonin për në Islamabad për negociata, megjithëse Teherani ende nuk e ka konfirmuar zyrtarisht pjesëmarrjen e tij dhe ka kërkuar heqjen e bllokadës.
Komentet erdhën ndërsa SHBA-të mbajnë një bllokadë detare ndaj anijeve që hyjnë dhe dalin nga portet iraniane që nga java e kaluar. Teherani e ka përshkruar bllokadën si shkelje të armëpushimit në vazhdim.
Trump paralajmëroi gjithashtu të dielën se SHBA-të do të shënjestronin infrastrukturën e Iranit nëse Teherani nuk pranonte kushtet e SHBA-së për t’i dhënë fund konfliktit, duke shtuar shqetësimin e tregut ndërsa armëpushimi do të skadojë të martën në mbrëmje sipas kohës së Uashingtonit.
Tensionet u rritën edhe për trafikun detar, pasi Irani fillimisht rihapi dhe më pas kufizoi sërish Ngushticën e Hormuzit, duke akuzuar SHBA-të për mosrespektim të detyrimeve.
