Komuna e Prishtinës ka bërë të ditur se projekti për instalimin e kamerave të sigurisë në kryeqytet po hyn në fazën e fundit të realizimit.
Ky projekt, që synon të rrisë sigurinë publike dhe të ndihmojë në menaxhimin më efikas të trafikut, përfshin vendosjen e disa llojeve të kamerave në pika strategjike të qytetit.
“Në kuadër të fazës së fundit të projektit për rritjen e sigurisë publike në Kryeqytet, janë instaluar 24 kamera me njohje automatike të targave (ANPR), 6 kamera videovezhguese multisensor dhe 1 kamerë rrotulluese PTZ,” thuhet në njoftimin e Komunës së Prishtinës.
Sipas njoftimit, kamerat janë vendosur në disa pika të rëndësishme të qarkullimit dhe sigurisë:
- Veternik – te “Shelli”;
- Veternik – te ura;
- Veternik – rruga kryesore (magjistralja Prishtinë–Ferizaj);
- Rruga “B” – rrethi te Maxi;
- Rruga “B” – rrethi te barnatoret;
- Shkolla “Pavarësia”;
- Hyrja/dalja te tuneli nën Kurriz;
- Shkolla Ekonomike;
- Te ura – rruga për Fushë Kosovë.
Ky projekt është pjesë e iniciativave të Komunës për modernizimin e infrastrukturës së sigurisë dhe për krijimin e një ambienti më të sigurt për qytetarët.
