Inspektorati Qendror i Punës ka ndaluar përkohësisht punimet në dy objekte ndërtimi në Komunën e Gjakovës, pasi gjatë inspektimeve janë evidentuar parregullsi që lidhen me sigurinë dhe shëndetin në punë.
Sipas njoftimit, gjatë kontrolleve është konstatuar se në këto objekte nuk ishin ndërmarrë masat e nevojshme për garantimin e kushteve të sigurta për punëtorët.
Për këtë arsye, Inspektorati ka nxjerrë vendime për ndalimin e përkohshëm të punimeve.
Punimet do të mund të vazhdojnë vetëm pasi të eliminohen mangësitë e evidentuara dhe të krijohen kushtet e nevojshme të sigurisë.
“Inspektorati Qendror i Punës mbetet i përkushtuar në mbikëqyrjen e zbatimit të legjislacionit të punës dhe apelon te të gjithë punëdhënësit që të respektojnë standardet e sigurisë dhe shëndetit në punë, me qëllim të parandalimit të aksidenteve në vendin e punës”, thuhet në njoftim.
