Çmimet e konsumit shënuan rritje mujore prej 3.54 për qind.
Çmimet e ushqimeve në Turqi muajin e kaluar ishin 99 për qind më të larta se në tetor 2021, kostot e banesave u rritën me 85 për qind dhe transporti me 117 për qind, njoftoi Instituti Turk i Statistikave, raporton CNBC.
Indeksi i çmimeve të prodhuesve vendas shënoi rritje prej 157.69 për qind në bazë vjetore dhe 7.83 për qind në bazë mujore.
Rritja dramatike e kostos së jetesës në vendin prej 85 milionë banorësh ka vazhduar e pandërprerë për gati dy vjet, së bashku me zhvlerësimin e ndjeshëm të monedhës kombëtare, lirës.
Lira ishte kryesisht e qëndrueshme ndaj dollarit sot dhe u tregtua me 18.61 për dollar. Në bazë vjetore, ajo humbi më shumë se 28 për qind të vlerës së saj kundrejt dollarit dhe në vitin 2021 ra me gati 50 për qind.
Presidenti turk Recep Tayyip Erdogan nuk lejon rritjen e normës bazë të interesit, duke këmbëngulur se kjo do të dëmtonte ekonominë. Ekonomistët dhe kritikët, nga ana tjetër, deklarojnë se politika e tij po dëmton lirën, po nxit inflacionin dhe po nxit krizën e monedhës.
Më 20 tetor, banka qendrore e Turqisë uli normën bazë të interesit me 150 pikë bazë për të tretin muaj radhazi, nga 12 për qind në 10.5 për qind, pavarësisht inflacionit që ishte më shumë se 83 për qind në atë kohë, sipas mediave amerikane.
