Presidenti i FIFA-s, Gianni Infantino, zbuloi të hënën se janë marrë 150 milionë kërkesa për bileta të Kupës së Botës, duke justifikuar politikën e çmimeve të kritikuar së fundmi nga tifozët.
Kritikat nga tifozët rreth Kupës së Botës 2026 janë intensifikuar kohët e fundit. Çështja në fjalë janë çmimet e biletave që ofrohen për ndeshjet.
Pa iu drejtuar drejtpërdrejt protestave, presidenti i FIFA-s, Gianni Infantino, i anashkaloi ato gjatë hapjes së Samitit Botëror të Sportit në Dubai të hënën, siç raportohet nga The National: “Në ditët e fundit, siç e keni vënë re pa dyshim, debati rreth biletave dhe çmimeve të tyre ka qenë i fortë.”
Para se të shprehte kënaqësinë e tij për kërkesën e jashtëzakonshme për këtë ngjarje, të organizuar nga Shtetet e Bashkuara, Kanadaja dhe Meksika nga 11 qershori deri më 19 korrik, ai filloi duke pyetur:
“Tani më tregoni, sa kërkesa për bileta mendoni se kemi marrë gjatë këtyre dy javëve? Ndoshta 5 milionë, ndoshta 10 milionë, ndoshta 20 milionë, çfarë mendoni? Epo, mund t’ju them, sepse në dy javë, në pesëmbëdhjetë ditë, kemi marrë 150 milionë kërkesa për bileta. Kjo do të thotë 10 milionë kërkesa për bileta çdo ditë.”
Për Infantinon, këto shifra demonstrojnë statusin unik të Kupës së Botës FIFA në skenën sportive ndërkombëtare. “Kjo tregon se sa i madh është interesi për një ngjarje e tillë. Dhe ajo që është interesante është se vendi pritës, SHBA është një nga ofertuesit kryesorë”, njoftoi ai.
“Gjermania dhe Mbretëria e Bashkuar janë përkatësisht në vendin e dytë dhe të tretë, gjë që tregon edhe një herë entuziazmin që rrethon Kupën e Botës”. Para se të shkonte edhe më tej në madhështinë e tij: “Ne mund të kishim mbushur ekuivalentin e 300 viteve Kupa Bote”.
