Një përleshje e shoqëruar me të shtëna armësh ka ndodhur sot në Komoran të Drenasit. Ngjarja ka shkaktuar shqetësim në opinion, sidomos për shkak të zhvillimit paralel të procesit zgjedhor në vend. Megjithatë, autoritetet kanë konfirmuar se incidenti nuk ka lidhje me zgjedhjet.
Lidhur me rastin, ka folur kryeprokurori i Prokurorisë Themelore të Prishtinës, Zejnullah Gashi, i cili tha se motivi i incidentit dyshohet të jetë një mosmarrëveshje e mëhershme mes palëve të përfshira.
“Arsyet e konfliktit nuk dihen në detaje, mirëpo sipas informatave të para që i kemi, kjo lidhet me një mosmarrëveshje të hershme, të para tre javësh,” tha Gashi.
Ai sqaroi gjithashtu se personat e përfshirë në incident janë të njohur për organet e rendit.
“Tre personat e dyshuar janë të përfshirë në grabitje dhe vepra të tjera ordinere dhe nuk lidhet me procesin zgjedhor,” theksoi kryeprokurori.
Sipas tij, nuk ka persona të ndaluar, pasi të dyshuarit kanë ikur nga vendi i ngjarjes para mbërritjes së policisë.
“Personat që kanë qenë të involvuar kanë ikur nga vendi i ngjarjes,” tha Gashi, duke shtuar se:
“Personat e shoqëruar në polici janë vetëm dëshmitarë. Të dyshuarit janë identifikuar dhe janë të njohur për policinë dhe prokurorinë.”
Hetimet mbi rastin janë duke vazhduar, ndërsa Policia e Kosovës dhe Prokuroria po punojnë për zbardhjen e plotë të ngjarjes dhe kapjen e të dyshuarve.
