Kryeministri i vendit, Albin Kurti ka pritur sot në takim delegacionet e SDA Sanxhak dhe PDD-së, dhe dy deputetët e tjerë në Kuvendin e Serbisë, Enis Imamoviq dhe Selma Kuceviq. Pas këtij takimi është deklaruar deputeti Imamoviq, i cili ka thënë se së bashku me Kurtin kanë diskutuar rreth përmbajtjes së propozimit franko-gjerman.
Imamvoqi ka theksuar se sot me Kurtin diskutuan për parimet bazë të marrëveshjes, pas përpjekjes së passukseshme për të biseduar me presidentin e Serbisë, Aleksandar Vuçiq, përcjell teve1.info
Ai thotë se në këtë takim kanë shprehur interesim që përmes planit franko-gjerman, të krijohet garanci për zgjidhjen e problemeve të boshnjakëve dhe shqiptarëve në Serbi.
“Pas një përpjekjeje të dështuar për të biseduar me presidentin e Serbisë Aleksandar Vuçiq në Parlamentin e Serbisë dhe për të mësuar prej tij përmbajtjen e propozimit të marrëveshjes franko-gjermane (evropiane), sot jemi takuar me kryeministrin e Kosovës, z. Albin Kurti diskutoi për parimet bazë të asaj marrëveshjeje dhe përcolli qëndrimin tonë për të. Në takimin me Kurtin kemi shprehur interesimin dhe vullnetin tonë që përmes atij dokumenti të krijojmë garanci për zgjidhjen e problemeve të boshnjakëve dhe shqiptarëve në Serbi”, ka shkruar ai në Facebook.
Deputeti Imamoviq potencoi se për ta është e rëndësishme që të zbatohen parimet e marrëveshjes franko-gjermane, e cila nënkupton se të gjitha të drejtat që do të kenë serbët në Bosnje dhe Hercegovinë, gjegjësisht në Kosovë, u garantohen boshnjakëve dhe shqiptarëve në Serbi.
Siç thotë ai, ata janë ende të gatshëm për ta diskutuar këtë temë me Vuçiqin, duke shpresuar se ky i fundit do i dëgjojë kërkesat e tyre.
“Qëllimi ynë është të bisedojmë me të gjithë aktorët dhe vendimmarrësit në këtë proces të normalizimit të marrëdhënieve dhe mundësive në rajon dhe në këtë kuptim do të inicojmë takime edhe me përfaqësues të bashkësisë ndërkombëtare. Ne do të ritheksojmë edhe një herë gatishmërinë dhe kërkesën tonë për të diskutuar këtë temë me presidentin e Serbisë, Aleksandar Vuçiq, me shpresën se ai do të jetë i gatshëm të dëgjojë pikëpamjet dhe kërkesat tona për këtë çështje. Vetëm kështu do të respektojmë parimin e marrëveshjes mbi bazën e parimeve të shëndosha që kanë të bëjnë me mbrojtjen e pakicave kombëtare dhe krijimin e paqes, besimit dhe bashkëpunimit të përhershëm ndërmjet vendeve dhe popujve të Ballkanit Perëndimor”, është shprehur ai. /Teve1.info/
