Instituti Kombëtar i Shëndetësisë Publike të Kosovës ka dhënë disa rekomandime për reduktimin e rrezikut nga ndotja e lartë e ajrit në Kosovë.
IKSHPK ka rekomanduar reduktimin e daljeve në qytet dhe ne vendet me ajër të ndotur sidomos në mëngjes dhe mbrëmje, veçanërisht për personat me sëmundje kronike të sistemit kardiovaskular dhe respirator, fëmijët dhe shtatzënat.
Po ashtu ka rekomanduar që të qëndrohet në shtëpi dhe mos të hapen dritaret për ajrosjen e dhomave, derisa zgjasin vlerat e larta.
IKSHPK më tej ka rekomanduar që personat të cilët pashmangshëm duhet të dalin në aktivitetet e tyre jashtë shtëpisë të përdorin maska mbrojtëse ose të mbulojnë gojën e hundën me shall.
Eshtë rekomanduar gjithashtu reduktimi i pirjes së duhanit jashtë ku ka qarkullim të njerëzve, e domosdoshmërisht ndalimi në hapësirat e mbyllura.
Ndërkaq, për grupet e popullatës së rrezikuar të tilla si me sëmundje kronike pulmonare, zemrës, pacientët astmatik dhe të prirur për alergji, të moshuarit, fëmijët e vegjël, gratë shtatzëna rekomandohet që të kalojnë më shumë kohë në mjedise me nivele të ulëta të ndotësve, të tilla si malet dhe vendpushime të shëndetshme.
