Ishte 11 korriku i vitit 2024.
Riza Hasani po punonte si shofer kamioni në fshatin Jezerc të Ferizajt.
Aksidentalisht, ai gjeti vdekjen derisa po drejtonte kamionin e kompanisë së tij.
Hasani kishte rënë disa metra poshtë nga rruga që po rregullohej nga kompania ku ishte i punësuar ai.
Vëllau i të ndjerit, Valoni thotë se ende s’e ka harruar atë moment.
“Qysh nga momenti i marrjes së lajmit për aksident, pastaj për humbjen e jetës së tij e deri te momentet më kritike që kanë qenë takimin me nënën, pastaj më vëllezërit tjerë, pastaj vendngjarja që është një vend tepër horror që mund të them”, tregoi vëllai i Rizahit, Valon Hasani.
Ani pse kanë kaluar afër dy vite, ky thotë se janë përballur me padrejtësi gjatë procesit gjyqësor ndaj kompanisë.
“Kamioni ka pasë një homologim falsifikuar pasi që ka pasë rimorkion e rritur për 20 cm ku volumi i tij ka qenë tepër më i madh… Për me ditë a ka qenë volumi në rimorkio ato janë refuzu dhe punëdhënësi ka thënë vetëm që janë fshi xhirimet, ata nuk e kanë konfisku as DVR-në për me shiku a janë rujtë, a është e vërtetë një gjë e tillë a s’është”, tha ai.
Ai tregon se janë në pritje të Gjykatës Kushtetuese për një vendim, por që nëse nuk është në anën e tyre, do ti shfrytëzojnë gjykatat evropiane.
“Shteti fatkeqësisht ka bërë shkelje të rënda në rastin e vëllaut tonë, nuk ka bërë asnjë lloj hetimi e ka mbyllë rastin. Ne presim një vendim tillë, por pas kësaj do të shqyrtojmë edhe mekanizma tjerë ndërkombëtarë ku do të kërkojmë drejtësi për vëllaun tonë”.
Kompania për të cilën punonte i ndjeri, “Bageri Company” për këtë rast ishte gjobitur me vetëm tetë mijë e 500 euro nga Inspektorati Qendror i Punës.
