Ishin duke u zhvilluar punime.
Por këtu në “Arbëri” të Prishtinës, paraditen e së martës, puna u ndërpre në gjysmë.
Një shirit sigurie u vendos dhe e gjithë zona u rrethua.
Kjo pasi një vinç u rrëzua.
Pas lëndimeve të marra, punëtori u dërgua për trajtim në Qendrën Klinike Universitare të Kosovës.
“Janë kryer ekzaminimet e duhura dhe konsultat e duhura. Gjendja është stabile, por është politraumë e rëndë. Do të transferohet në Klinikën e Ortopedisë për vazhdim të trajtimit”, thuhet në njoftimin e Qendrës Emergjente.
Në vendin e ngjarjes u pa edhe Inspektorati Qendror i Punës.
Derisa detaje rreth rastit dhanë Policia e Kosovës.
“Sot rreth orës 10:00 kemi pranuar informatën se një person është lënduar deri sa ishte duke punuar në rrugën ‘Bashkim Fehmiu’ në Prishtinë. Njësitet policore kanë dalë menjëherë në vendin e ngjarjes kurse personi i lënduar është dërguar për tretman mjekësor. Aktualisht njësitet relevante janë duke u marrë me sqarimin e plotë të rrethanave të rastit”, ka njoftuar Policia e Kosovës.
Si pasojë e aksidenteve të shumta në vende pune, Inspektorati Qendror i Punës ka nisur inspektimet, ku vetëm një ditë më parë, punimet janë ndaluar në 16 vendpunishte.
