Për javën e dytë rresht, sulmuesi i Llapit, Muhamet Hyseni ka fituar epitetin më të mirë të futbollistit të javës.
FFK-ja, të martën ka bërë të ditur se Hyseni është shpallur “Ylli i Javës” për xhiron e 32-t të Superligës së Kosovës në futboll pas vlerësimit nga Komisioni i veteranëve të futbollit.
Hyseni ishte më i merituari për fitoren e Llapit 3:2 në shtëpi kundër Feronikelit ’74 pasi shënoi dy gola dhe bëri një asistim. Për Hysenin, i cili prinë në listën e golashënuesve të Superligës me 23 gola të realizuar, kjo është hera e gjashtë këtë edicion që shpallet më i miri i javës.
Ai është shprehur i lumtur që sërish është vlerësuar për paraqitjen e tij.
“Jam i lumtur për çmimin, i cili është i gjashti për mua. Ky çmim padyshim është motiv shtesë për punë, fitore e çmime të radhës”, ka thënë Hyseni për faqen zyrtare të FFK-së, ndërsa shtoi se këtë çmim e ndanë me të gjithë bashkëlojtarët e ekipit.
Llapi, aktualisht mbanë pozitën e dytë në tabelë me 64 pikë, dy më pak se Ballkani që është lider kur kanë mbetur edhe katër xhiro deri në fund të edicionit. Ndeshjen e radhës, Llapi e luan të enjten kundër Gjilanit.