Ish-ministri i Punëve të Jashtme, Skënder Hyseni, për takimin e së hënës mes kryeministrit, Albin Kurti dhe presidentit të Serbisë, Aleksander Vuçiq ka thënë se është dita kur ka shumë shqetësime e paqartësi dhe që sipas tij, ngritën shumë pyetje,
Hyseni përmes një postimi në Facebook i ka parashtruar disa pyetje në rast se Kurti e refuzon propozimin e BE-së, raporton teve1.info
“Para se të flitet për cilësinë e propozimit evropian, kujtoj se diskursin politik sot duhet ta mbizotërojë pyetja: Cila është alternativa në rast se Kurti refuzon këtë propozim? Pastaj, pse dhe çka e solli situatën kur Kosova detyrohet që në vend që të fliste për njohje të ndërsjellë, de jure, e ka katandisur veten në pozicionin e reparimit të dëmeve, përkatësisht ndaljen e katandisjes së mëtejme!”, ka shkruar ish-ministri.
Sipas Hysenit, kryeministri i vendit, Albin Kurti dhe presidentja, Vjosa Osmani, e kanë dëmtuar dhe minuar keq pozicionin e Kosovës në raport me bashkësinë ndërkombëtare.
“Albin Kurti dhe Vjosa Osmani, me qasjen e tyre egocentrike e aventureske në dialog me Serbinë e ka dëmtuar dhe minuar keq pozicionin e Kosovës në raport me bashkësinë ndërkombëtare, sidomos me administratën amerikane, ndërsa ka forcuar pozicionin e Serbisë, duke e forcuar ate në relacionet ndërkombëtare si kurrë më parë”, është shprehur ai.
Hysni e ka cilësuar humbje rastin ideal që të forcojë pozicionin e saj negocues dhe partneritetin me ShBA-të dhe BE-në.
“Në politikë nuk ka riprovime. Kosova me këtë udhëheqje, ka humbur rastin ideal që të forcojë pozicionin e saj negociues dhe partenteritenin me SHBA=të dhe BE-në. Kosova po e paguan koston e revolucinarëve Kurti e Osmani”, ka shkruar ai.
