Për 14 vjet qëndroi në krye të shtetit fqinj.
E pozitën si figurë dominuese në politikë, Alendsandër Vuçiq, nuk e përdori vetëm brenda shtetit serb.
Gjatë gjithë kësaj kohe, Vuçiq ndikimin e tij u mundua ta shtrinte edhe në Kosovë.
E gjitha kjo, përmes Listës Serbe, krerët e të cilës, haptazi e vizitonin Beogradin për instruksione.
Por, humbja në Zgjedhjet Parlamentare në Serbi, e ish-presidentit që synonte karrigen e kryeministrit, mund të sjellë ndryshime edhe tek kjo listë.
Madje ndikimi i saj tek komuniteti serb në Kosovë, sipas deputetit të Lëvizjes Vetëvendosje, Fahrush Rexhepi, mund të dobësohet.
Deputeti i Lëvizjes Vetëvendosje, Farush Rexhepi, vlerëson se kjo mund të ndikojë në dobësimin e Listës Serbe në Kosovë.
“Qarqet politike serbe nuk ndryshojnë shumë, ndërsa humbja e Vuçiqit në Serbi besoj do të ketë efekt pozitiv në Kosovë, e veçmas ajo çka ka të bëjë me Listën Serbe. Mendoj se do të bjerë shumë ndikimi i Listës Serbe në Kosovë, e cila e ka përfaqësuar popullatën serbe në Kosovë, mirëpo e dimë se si ka funksionuar”, ka thënë Fahrush Rexhepi, deputeti i LVV-së.
Por, një mendim tjetër ka deputeti i Lidhjes Demokratike të Kosovës, Arben Gashi.
Ai thotë se forcat e reja politike në Serbi mund të paraqesin sfidë për Kosovën, pavarësisht ndryshimeve në skenën politike atje.
“Retorika e tyre është e fituesve të rinj, për mos me thanë ma e ashpër se e Vuçiqit. Prandaj mendoj se ata mund të jenë rreziku i ardhshëm, sepse perceptohen për dy-tri vitet e ardhshme nga Perëndimi si modernë, të hapur dhe liberalë. Dhe mund të jenë rrezik për Kosovën, sepse Kosova mund të dalë në pozitën e jo bashkëpunuesit, në pozicionin e problematikut”, ka thënë deputeti i LDK-së, Arben Gashi.
Ndërkaq, deputetja e Aleancës për Ardhmërinë e Kosovës, Time Kadrijaj, thotë se ndryshimi i pushtetit nuk nënkupton domosdoshmërisht ndryshim të qasjes së Serbisë ndaj Kosovës.
“Është e çuditshme se kur është në pyetje Kosova, fare nuk po ndryshon mentaliteti i partive politike në Serbi. Sa më mirë dhe sa më shpejt që e kuptojnë realitetin se Kosova është një shtet i pavarur, edhe ta kuptojnë këtë realitet, të mos kenë qasje të tilla e të mos kenë tendenca të sulmeve, duke bërë fushatë në Kosovë e duke thënë që Kosova është e Serbisë, nuk u bën nder as atyre”, u shpreh deputeti i Aleamcës, Time Kadrijaj.
Ndërkohë, në Parlamentin e Serbisë, shqiptarët do të përfaqësohen me dy mandate.
